Hay’adda Maareynta Horumarinta Dalka ayaa Muqdisho ku qabatay dood cilmiyeed ku saabsan dhameystirka qabyo qoraalka Dastuurka iyo caqabadaha hortaagan.
Madasha ayaa waxaa ka qeybgalay Xildhibaanno ka tirsan Baarlamaanka Federaalka Soomaaliya, aqoonyahanno, mas’uuliyiin ka socotay Guddiga la socodka Dastuurka, madax ka tirsan Wasaaradda Dastuurka iyo xubno kale, kaasi oo lagu qabtay Muqdisho.
Wasiiru dowlihi hore ee Xafiiska Ra’iisul Wasaaraha ahna Agaasimaha Hay’adda Maareynta Horumarinta Dalka Cabdullaahi Xaamud Maxamed oo ugu horeyn ka hadlay madasha ayaa sheegay in ujeedka Hay’adda loo aas aasay ay tahay sidii tababaro loo siin lahaa shaqaalaha Dowladda, isla markaana ay u qaban lahaayeen doodo cilmiyaysan oo ku saabsan dib u habeynta Dowladda.
Guddoomiyaha Maamulka Sare ee Hay’adda Maareynta Horumarinta Dalka Prof Yaxye Cali Ibraahim ayaa sheegay in Cilmibaaris taxane ah oo ay soo diyaariyeen ay bulshada la wadaagi doonaan, maantana ay ka doodayaan caqabadaha ku xeeran dhameystirka geeddi-socodka dib u eegista Dastuurka Dalka.
Prof Yaxye ayaa ka sheekeeyay heerarkii kala duwanaa ee uu soo maray dhameystirka geeddi-socodka dib u eegista Dastuurka iyo hanaanka loo wajahayo .
Xildhibaan Maryan Cariif Qaasim oo ka mid ah mudanayaasha Baarlamaanka Federaalka Soomaaliya oo madasha ka hadashay ayaa xustay in dastuurka uu u baahanyahay in la geliyo waqti badan.
Qaar ka mid ah mas’uuliyiinta ka qeybgalay madasha aqoon isweydaarsiga ayaa xusay in dastuurka uu u baahanyahay in dad aqoon durugsan u leh ay ka qeyb qaataan dhameystirka geeddi-socodka dib u eegista Dastuurka.
Agaasimaha Wacyigelinta ee Wasaaradda Dastuurka ee Xukuumadda Federaalka Soomaaliya Mudane Cabdiqani Cali Aadan ayaa sheegay in dib u dhaca dastuurka ku yimid uu sabab u ahaa doorashooyinka ka bilowday dowlad Goboleedyada, maadaama hannaanka doorashooyinka uu yahay mid kala duwan oo dowlad Goboleed kasta ay waqti u gaar ah qabsadaan, balse ay hadda rajeynayaan in Dowladda cusub ay la wadaagi doonaan waxyaabaha u qabsoomay Wasaaradda Dastuurka.
