Qaban qaabo ku aadan qabsoomidda Doorashada kursi ka mid ah Golaha shacabka ee Baarlamaanka Federaalka Soomaaliya ayaa ka soconaysa magaalada Kismaayo ee xarunta KMG ah ee Jubbaland, kursigaasi oo ahaa kii uu ka geeriyooday allaha unaxriistee Marxuum Ex Wasiir Cabaas C/laahi Sheekh Siraaji.
Waxaa ku sugan magaalada Kismaayo guddiga doorashooyinka Qaranka, iyadoo ay diyaarsanyihiin ergooyinkii dooranayay xildhibaankii buuxin lahaa kursigaasi oo ka bannaan Golaha Shacabka, sida uu ku soo waramayo wariyeheenna Aadan Maxamed Salaad.
Xubnaha ku tartamaya kursigaasi ayaa wararku ay sheegayaan in uu ka mid yahay wiil la dhashey marxuum Cabaas C/llahi Sheekh Siraaji, kaasi oo lagu magacaabo Maxamuud C/llaahi Sheekh Siraaji.
Waxaa ay noqonaysaa doorashadan uu qabanayo gudiga doorashooyinka Qaran tii labaad muddo todobaadyo gudohooda, iyadoo dhawaan magaalada Jowhar ee xarunta maamulka Hirshabeele ay ka dhacday doorashada kursigii ka banaanaa Golaha Shacabka ee deegaan doorashadiisu ay ahayd Hirshabeele, kaasi oo uu ku guuleystay Nuur Iidow Beyle.
