Agaasimaha guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Guuleed Cabdijaliil oo uu wehliyo agaasimaha waaxda Shaqada iyo shaqaalaha ee Wasaaradda Caafimaadka Maxamed Xuseen Calasow isla markaana Safar shaqo mudo labo maalin ah u joogey dalka Finland ayaa kulamo wax ku ool ah la qaatey Agaasimaha xigeenka Afrika ee Wasaaradda Arimaha Dibada ee dalka Finlnad Markus Heydemann, Madaxa geeska Afrika ee Wasaaradda Arimaha Dibada Finland Elina Saaristo-Diatta, Madaxa IOM Soomaaliya Frantz Celestin iyo Tobias van Treeck Madaxa IOM ee dalka Finland.
Kulamada kala duwan ayaa ahaa inta badan kulamo daarnaa horumarinta Caafimaadka Soomaaliya iyo sidii dalkeenu u heli lahaa nidaam Caafimaad oo dhameystiran kana xoog badan midka aan hadda heysano si loo xaqiijiyo yoolka Dowladda ee ku aadan horumarinta Caafimaadka Soomaaliya oo geedigiisu maryo heer fiican.
Related posts
Agaasimaha iyo Hey’adda IOM ayaa ka wada hadley Mashruuca MIDA FINNSOM oo mashruuc loogu talagaley in khibradleyda iyo kaadiriinta Caafimaadka baratey dib loogu soo celiyo dalka si loo horumariyo Caafimaadka Soomaaliya taasoo qeyb wayn ka qaadaneyso in la helo nidaam Caafimaad oo isku dhayla tiran islamarkaana qeyb ka ah hadafka xukuumadda ee ah Caafimaadka tayeysan.
Agaasimaha guud ee Wasaaradda Caafimaadka iyo daryeelka bulshada Xukuumadda Federaalka Soomaaliya ayaa sidoo kale waxaa uu booqday Isbitaalka Jaamacadda Helsink iyo Jaamacadda Metropolia University oo ka mid ah Jaamacadaha iyo Isbitaalada ka qeyb qaata hagaajinta iyo horumarinta qeybta Caafimaadka, waxa uuna agaasimuhu kala hadley sidii Isbitaalka iyo Jaamacadduba uwada shaqeyn lahaayeen Wasaaradda Caafimaadka Soomaaliya.
Agaasimaha waxa uu sidoo kale kulamo la qaatey Jaaliyadda Soomaaliyeed ee ku dhaqan dalka Finland, waxa ayna ka wada hadleen sidii loo horumarin lahaa Caafimaadka Soomaaliya iyadoo uu agaasimaha guud ee Wasaaradda Caafimaadka iyo daryeelka bulshada Xukuumadda Federaalka Soomaaliy soo jeediyey in la maalgashto Caafimaadka dalka taasoo keeneysa isku tashi dhinac kasta ah iyadoo la marayo Istiraatiijitadda dowladda ee horumarinta Caafimaadka.
Ugu dambeyn Agaasimaha guud ayaa ugu mahadceliyey Madaxda iyo Dowladda Finland garab istaagga ay markasta garab taagan yihiin Shacbiga Soomaaliyeed gaar ahaan taageerada ay ku bixiyaan qeybta Caafimaadka oo ah meesha ugu muhiimsan ee u baahan in la xoojiyo markasta si bedqabka bulshadu u hagaagto.
Wasaaradda Caafimaadka iyo daryeelka bulshada Xukuumadda Federaalka Soomaaliya waxaa ka go’an islamarkaana diradda u saaran kor u qaadida iyo dardargelinta tallaabooyinka lagu horumarinayo Caafimaadka Soomaaliya iyo xaqijinta yoolka Xukuumadda ee Caafimaadka Dalkeena.
