Duqa dagmada Galkacyo Cabdiraxmaan Sheekh Xasan Jimcaale ayaa tababar u soo xiray dufcaddii saddexaad ee si lacag la aan ah uga barta xirfado ay ku shaqeeysan karaan Dugsiga barashada farsamada Gacanta ee Prof Caddoow ee Magaalada Gaalkacyo.
Munaasabada tababarka loogu soo xirayay 75 dhallinyaro ah oo isugu jira rag iyo dumar ayaa waxaa ka qeyb galay mas’uuliyiin kala duwan, waxgarad iyo xubno ka socday ururada haweenka iyo dhallinyarada
Qaar ka mid ah waxgaradkii iyo xubnihii ka hadlay madasha tababarka lagu soo xirayay ayaa bogaadiyay dadaalka ka socanaya xarunta dugsiga Prof Caddow, taas oo ay xuseen in ay meesha ka saareeyso shaqo la’aan heysatay dhallinyaro farabadan oo ku nool deegaannada Galmudug, sidoo kalana xusay in waxqabadka Dugsiga Prof Caddoow haatan laga dareemayo Gaalkacyo, maadaama haatan shaqooyin meelo fog fog cid taqaana loo raadin jiray dhaqaale farabadana ku bixi jiray looga kaaftoomay markii dhallinyaro badani ay ka faa’iideeysteen Barashada farsamada Gacanta ee ay ka barteen Dugsiga Tababarka Prof Caddoow.
Duqa Dagmada Gaalkacyo Cabdiraxmaan Sheekh Xasan oo tababarka soo xiray ayaa ka codsaday shirkadaha gaarka loo leeyahay iyo Ganacsataduba inay dhiiri galiyaan dhallinyarada aqoonta u leh xirfado badan oo Gaalkacyo looga baahnaa, isagoo xusay in ka maamul ahaan ay dhiiri galinayaan dhallinyarada.
