Guddoomiyaha gobolka Banaadir ahna Duqa Muqdisho Cumar Maxamuud Maxamed “Filish” ayaa uga mahad celiyay guddoonka iyo Xildhibaanada golaha shacabka ee Baarlamaanka Jamhuuriyadda Federaalka Soomaaliya xaqiijinta Mataaladda siyaasadeed ee Gobolka Banaadir, taas oo madaxweye Farmaajo uu ku soo jeediyey furitaankii Kal-fadhigii 7aad ee Baarlamaanka.
Qoraal kooban oo uu Duqa Muqdisho soo dhigay bartiisa Facebooka ayuu ku yiri” Waxaan u mahadcelinayaa Baarlamaanka JFS oo maanta si aqlabiyad leh u ansixiyay xeerkii Matalaadda Gobolka Banaadir ee Aqalka Sare, Waxaad muujiseen kaalin lama ilaabaan ah oo taariikhda gashay oo aad ugu hiiliseen shacabka Gobolka Banaadir.
Sidoo kale, Guddoomiye Cumar Filish ayaa hambalyo ku aaddan guusha matalaadda gobolka Banaadir u diray shacabka gobolka Banaadir,wuxuuna caddeeyay in guushan u soo hoyotay Bulshada ku dhaqan gobolka Banaadir ay ku timid Adkeysi, Sabar badan, abaalkii ay Qaranka u galeen ee canshuurtooda ku bixiyeen Dowladnimada miraheedi maanta ay heleen,”
Ugu dambeyntii, Duqa Muqdisho ayaa u mahadceliyay Madaxweynaha JFS Mudane Maxamed C/llaahi Farmaajo oo geed dheer iyo mid gaaban u koray sidii Gobolka Banaadir matalaad ugu heli lahaa Aqalka Sare, isagoo horay u taageernay baaqiisii uu Baarlamaanka ka hor-jeediyay 6-dii bishan June 2020, taas oo aheyd tallaabo geesinnimo leh.
