Madaxweynaha Turkiga Recep Tayyip Erdogan, ayaa galinkii danbe ee shalay shaaca ka qaaday aragtida xisbiga talada haya ee Cadaaladda iyo Horumarka ee ku aaddan yoolalka Jamhuuriyadda Turkiga ee Qarniga cusub.
Arrintan ayuu Erdogan kaga dhawaaqay intii uu socday shir lagu qabtay magaalada Ankara ee caasimadda dalkaasi, waxuuna Erdogan Carrabka ku adkeeyay in mid ka mid ah yoolalka ugu horreeya ee hiigsiga dalkiisa ee qarniga soo socda uu yahay in dalka laga hirgaliyo dastuur cusub oo ku yimaado rabitaanka Shacabka Turkiga.
Waxaanu intaa ku daray “ Waxaan kor u qaadi doonaa hamiga dhalinyaradeena, inagoo xoogga saari doonna dhinacyada xorriyadda, Ganacsiga iyo Waxbarashada, Teknoolajiyada, Fanka, Ciyaaraha iyo dhamaan adeegyada Bulshada, himiladeena waxaa ka mid ah in waddankeena uu ka mid noqdo 10-ka dal ee ugu horeeya Caalamka, iyadoo laga fiirinaayo dhinacyada Siyaasadda, Dhaqaalaha, Tignoolajiyada, horumarinta Ciidamada iyo Diblomaasiyadda.
Erdogan waxuu Carrabka ku adkeeyay in qarniga soo socda uu Turkiga u noqon doono qarnigii Nabadda, isla markaana uu ka shaqeeyn doona sidii loo heli lahaa xasiloonida gobolka.
Madaxweynaha Turkiga ayaa dejiyay hannaan Ganacsiga dibadda ee Turkiga lagu gaarsiinayo hal trilliyon oo dollar, iyo sidii daqliga dalxiiska dalka looga soo xareyn lahaa 100 bilyan oo doolar.
