Inta la ogyahay 2 qof ayaa ku dhimatay tiro kalena waa ay ku dhaawacmeen Qarax ka dhacay aagga PDRC ee magaalada Bosaaso ee xarunta Gobolka Bari.
Qaraxa ayaa ka dhacay goob lagu qaxweeyo oo ku taala magaalada, waxaana dadkii ku dhaawacmay weerarka la geeyay goobaha caafimaadka, waxaana ciidamada ammaanka oo goobta soo gaaray ay halkaasi ka bilaabeen howlgallo amni xaqiijin ah.
Dhanka kale Wasiirka Wasaaradda Qorshaynta Qaranka mudane Jamaal Maxamed Xasan ayaa Isbitaalka ku booqday Dadkii ku waxyeeloobay qaraxii maanta ka dhacay magaalada Bosaaso, kuwaasi oo uu mid mid u wareystay xaaladooda caafimaad.
Wasiirka ayaa warbixinno ka dhageystay qaar ka mid ah howlwadeennada Isbitaalka magaalada Boosaaso, isagoo Alle uga baryay dadkii ku dhintay qaraxa, halka kuwa ku dhaawacmayna uu Alle uga baryay inuu bogsiiyo.
