Kulan ay isugu yimaadeen xubnaha golaha ammaanka ee Q/midoobay ayay diirada ku saareen arrimaha dalka Soomaaliya, gaar ahaana arrimaha howlgalka xafiiska Q/midoobay ee (UNSOM), waxaana kulankan Soomaaliya uga qeybgalay xubno uu hogaaminayay Sii-hayaha madaxa ergada Q/midoobay ee Soomaaliya Mudane Cawaale Cali Kullane, isaga oo halkaasina ka jeediyay hadal.
Kulankan oo sidoo kale, looga dooday horumarada Dowladda Federaalka ee dhinacyada, Amniga, dhaqaalaha, howlgalka nabad illaalinta ee AMISOM, qatarta ka immaaneysa kooxaha argagixisada, wuxuuna goluhu muhiimad u arkay in muddada loo kordhiyo howlgalka xafiiskeeda dalka Soomaaliya, ee uu madaxda ka yahay Amb. Nickolas Key, waxaana ogolaansho buuxda loo siiyay inuu sii shaqeeyo illaa sanadka 2016.
Golaha ammaanka ayaa ku booriyay xafiiskan inuu baahiyo howlgalkiisa isla markaana uu gaaro dhamaamba gobolada iyo degmooyinka dalka oo dhan, si loo helo adeeg isku dheeli tiran oo ay dareemaan maamulada iyo dhinacyada kale ee Soomaaliya.
Cawaale Cali Kullane oo kulankan ka jeediyay hadal ayaa uga mahadceliyay golaha ammaanka ee Q/midoobay ka warqabkooda iyo garab siinta Dowladda iyo shacabka Soomaaliyeed, wuxuuna xusay in Dowladda Federaalku ay ku howlan tahay dhismaha iyo tayayenta hay’addaha dowliga, sida hay’addaha Garsoorka, Maaliyadda, Amniga iyo horumarinta Bulshada iyo sidoo kale Hiigsiga 2016.
“Golaha ammaanka waxaan uga mahadcelinay sida hufan ee ay ula shaqeyso Dowladda Federaalka Soomaaliyeed iyo hogaankeeda” ayuu yiri Cawaale Cali Kullane.
Sidoo kale, Cawaale Kullane ayaa ku bogaadiyay golaha Ammaanka ka codsaday inay si gaar ah uga taageeraan Dowladda Soomaaliyeed, tayeynta iyo isku dhafka ciidanka si ay u gaaraan isku filnaashiyo buuxda, awoodna u yeesha inay dalka oo dhan kaga hortagaan duullaanada caddowga.
“Waxaan si gaar ah ugu mahadcelinayaa ciidamada nabad illaalinta ee AMISOM oo naftooda u huray sidii Soomaaliya ay u gaari laheyd nabad iyo xasilooni buuxda, mar kastana ciidankeena Xooga dalka la garab taagan taakulo ciidan si wadanka looga saaro goobaha ay weli ku harsan yihiin kooxaha argagixisada ee Al shabaab” ayuu mar kale ku yiri khudbadiisa Cawaale.
Ugu dambeyntiina, Mudane Cawaale Cali Kullane ayaa uga warbixiyay dadaalada ay Dowladdu wado, gaar ahaana dhisida maamul goboleledyada, sida Jubba land, Koofur Galbeed, iyo Galmudug, haatana ku howlan sidii ay u yagleeli laheyd maamul ay yeeshaan gobolada Hiiraan iyo Shabeelaha dhexe.
