Kulanka Golaha Aqalka sare ee dalka ayaa waxaa shir guddoomiyey guddoomiyaha Golaha Aqalka Sare ee dalka Mudane Cabdi Xaashi Cabdullaahi.
Ugu horeyn kulanka ayaa waxaa warbixinta akhrinta koowaad laga dhageystay Wasiirka Tamarta iyo Kheyraadka Biyaha Xukuumadda Soomaaliya Mudane Saalim Caliyoow Ibroow oo si faah-faahsan u akhriyey sharcigaas.
Wasiirka Tamarta iyo Kheyraadka Biyaha Soomaaliya Mudane Saalim Caliyow Ibrow ayaa sheegay in sharcigaan uu yahay mid muhiim u ah dalka, islamarkaana uu ahmiyad gaar ah ugu fadhiyo shacabka Soomaaliyeed.
Dhinaca kale guddoonka Golaha Aqalka Sare ayaa magacaabay guddi dabagal iyo baaris ku sameeya sababtii ka dambeysay weerarkii lagu qaaday Hoyga Senator Cabdi Xasan Cawaale (Qeybdiid) guddigaas oo ka kooban ilaa iyo 6-xubnood, waxaana guddigaasi aqbalay Golaha oo la horkeenay.
Guddigaan lixda xubnood ka kooban ayaa waxaa guddoomiye u ah Sanatar Maxamed Amiin waxaana looga fadhiyaa in ay sida ugu dhaqsiyaha badan ay ku soo gudbiyaan warbixin dhammeystiran.
Kulanka guud ee Golaha Aqalka Sare ayaa Ajendaha lagu soo daray xaaladda Sohdinta u dhaxeysa Soomaaliya iyo Kenya, gaar ahaan degmada Beled-xaawo, Senator Cabdi Ismaaciil Far-taag ayaana soo gudbiyey warbixinta ka hadleysa xaaladda Xudduudda.
“Waxaan ka mid ahaa wafdi horay u tagay Balad Xaawo oo uu horkacayay wasiirkii hore Arrimaha Gudaha, waxaana xiligaas baaritaano ku soo samaynay sida ay wax u jiraan waxaa loo baahan yahay in arintan loo istaago”ayuu yiri Sanatar Fartaag.
Qodobkaas la xiriira arinta Balad Xaawo ayaa la geliyey dood iyadoo laba aragti la soo jeediyey oo mid ka mid ahna ay tahay in loo yeero wasiirrada Arrimaha Dibedda, Arrimaha Gudaha iyo wasiirka Amniga Gudaha Soomaaliya.
