Kulankan oo lagu taageeraya Ra’isul wasaaraha Soomaaliya mudane Cumar Cabdirashiid ayaa waxaa soo agaasimay Golaha Naafada Qaranka Soomaaliyed waxaana ka qeyb galay gudoomiyaha Golaha Naafada Qaranka Soomaaliyed,agaasimaha xafiiska Ra’isul wasaaraha dhinaca arrimaha bulshada iyo xiriirka dadweynaha,Ururka Haweenka Qaranka Soomaaliyed iyo qaar kamid ah dadka Naafada ah kuwooda ku nool magaalada Muqdisho.
Cali C/laahi Salad Guddoomiyaha Golaha Naafada Qaranka Soomaaliyed oo la hadlay warbaahinta ayaa ugu baaqay Ra’isul wasaaraha Soomaaliya inta uusan xukuumada dhisan in uu kulan la qaato dadka naafada Soomaaliyed si uu u ogaado dhibaatada haysata maadaama ay yihiin dadka ugu nugul bulshada Soomaaliyeed.
Warsan Xassan Xagar oo ah xoghayaha xiriirka degmooyinka ee Ururka Haweenka Qaranka oo goobta ka hadashay ayaa sheegtay in dowlada Soomaaliya ay il gaar ah ku fiiriso xaquuqda dadka naafada ah ee ku dhibaateysan gudaha dalka.
Agaasimaha xafiiska Ra’isul wasaaraha dhinaca arrimaha bulshada iyo xiriirka dadweynaha Cabdicaziis Cabdullaahi (Dhagaqool) ayaa kulanka ka sheegay in Ra’isul wasaaraha uu diyaar u yahay sidii ay xaquuq u heli lahaayen dadka naafada ah.
Dadka Naafada ah ayaa waxaa ay yihiin kuwo duruufo adag ku haysata magaalada Muqdisho iyo guud ahaan dalka oo dhan waxaana kulankan uu qeyb ka ahaa meelaha ay dhibaatadooda ku soo bandhigaan dadka Naafadda ah oo baahi weyn u qaba in la caawiyo.
