Guddoomiyaha Maxkamadda sare ee dalka Garyaqaan Baashe Yuusuf Axmed, ayaa maanta shir guddoomiyey kulan ay isugu yimaadeen Taliyaha ciidanka Booliska Soomaaliyeed Sarreeye gaas Bashiir Cabdi Maxamed, Guddoomiyaha maxkamadda Racfaanka Gobolka Banaadir, Guddoomiyaha Maxkamadda Gobolka Banaadir iyo garsooyeyaal.
Kulankaasi, ayaa looga hadlay qodobo ay kamid ahaayeen Arrimaha been abuurka, fulinta Xukunnada maxkamaddaha ee dhaqan galay, dhulalka dowladda ee sida sharci darrada ah lagu heysto iyo arrimo kale.
Waxaa kulanka lagu soo bandhigay buug yar oo qodobeysan, kaasi oo ka hadlaya qaabka sharciyeed ee loo marayo fulinta xukunnada Maxkamaddaha ee dhaqan galay, kaasi oo ay qoreen guddi Garsooreyaal ah oo loo xilsaaray.
