Hay’adda Culumada Al-Bayaan ee Pretoria ayaa kulan u qabatay Madaxda Safaaradda iyo Qaar ka mid ah Waxgaradka iyo Ganacsatada Dalka Konfur Afrika, waxaana loogu hadlayay isku xirka Jaaliyadda Soomaaliyeed ee Pretoria iyo Safaaradda.
Kulankan oo ahaa mid is xog wareysi ayaa diiradda lagu saaray dhibaatooyinka Jaaliyadda, gaar ahaan bilaha November iyo December ee sanad dhamaadka, waana xilliyada ugu badan dilalka iyo dhac loogu geysto ganacsatada Soomaalida tuulooyinka dalkaasi.
Waxgaradka iyo Ganacsatada ka hadlay kulanka waxa ay Madaxda Safaaradda ka codsadeen inay ka caawiso dhibaatooyinka xagga Waxbarashada dhallaanka soo koraya, Isbitaalada oo Hooyooyinka qaarkood cabasho ka muujiyeen iyo sharciyada.
Danjire Maxamed Cali Mire ayaa uga mahadceliyay Culumada Al-Bayaan kulankan ay u qabatay Safaaradda iyo Ganacsatada magaalada Pretoria, waxa uuna Danjiruhu ballanqaaday inay ka shaqeyn doonaan xiriirka Dowladda Koonfur Afrika iyo Ganacsatada isagoo dhan kale ka codsaday ganacsatada inay dhistaan Jaaliyad isku xiran.
Intii uu kulanka socday waxaa jiray su’aalo ku saabsan adeegyada ay bixiso Safaaradda, waxaana lagu ballamay in la joogteyn doono kulamada noocani ah ee isku xirka Jaaliyadda Pretoria iyo Madaxda Safaaradda.
W/D: Cabdiqaadir Axad Dhaqane, Pretoria.
