Guddoomiyaha Hay’adda Maareynta Musiiboyinka Qaranka, mudane. Maxamuud Macallin Cabdulle ayaa maanta Muqdisho kula kulmay wafdi uu hor kacayay Maciej Popowski oo ah Agaasimaha guud ee Xafiiska Midowga Yurub u qaabbilsan isku dubarridka howlaha Beni’aadannimo iyo ilaalinta Shacabka.
Labada dhinac ayaa kawada hadlay in si wadajir ah wax looga qabto saamaynta ka dhalata Isbeddelka Cimilada sida, Abaaraha iyo Fatahaadaha.
Sidoo kale hay’adda SoDMA ayaa kulanka ku soo bandhigtay gurmadkii iyo gargaarkii ay gaarsiisay degaannadii ay waxyeelada ka soo gaartay Isbeddelka Cimilada, waxyabaha kaga aaddan ka hortagga leexsashada gargaarka, horumarkii laga sameeyay arrintaas iyo tallaabooyinkii la qaaday.
Sidoo kale, waxyabaahii kulanka looga hadlay waxaa kamid ahaa xoojinta iyo kor u qaadista awoodda hay’adda dhanka kasoo kabsashada aafooyinka iyo dejinta qorshaha ka hortagga iyo maareynta musiibooyinka, iyo sidii adeegyada aas-aasiga ah loo gaarsiin lahaa dadka iyo degaannada ay waxyeelladu saameysay, waxaana qeyb ka ahaa kulankaan Sandra Goffin oo ah madaxa ECHO ee geeska Afrika iyo Javier Rio Navarro oo ah madaxa xafiiska ECHO ee Somaaliya
