Agaasimaha fulinta hey’adda lacagta aduunka IMF Kristalina Georgieva ayaa sheegtay in hey’adoodu heshay lacag ku filan oo lagu bixin karo deynta Soomaaliya lagu leeyahay, Boqol dal ka badan ayaa balan qaaday in ay diyaar u yihiin ka qeyb galka bixinta deymaha Soomaaliya lagu leeyahay.
Kristalina Georgieva ayaa tiri “100 xubnood oo ka.mid dalalka ku bahoobay hey’adda ay ansixiyeen 334 milyan oo doolar oo lagu maalgalinayo dayn cafinta Soomaaliya, mar alaala iyo marka la helo lacagahani waxaa loo gudbiyaa cafinta daymaha, maalgalintani waxay gaarsiinaysaa hal abuurka dayn dhaafka wadamada faqriga ah, sidookale wadiiqadani waxay albaabka u furaysa dhaqaale hor leh oo lagu taageerayo Soomaaliya.”
Agaasime Kristalina Georgieva waxay ku dartay “Go’aanka maalgalinta ee maanta waa mid taariikhi ah oo Soomaaliya u abuuraya fursad ay hore ugu socoto hanaankan, Hey’adda lacagta aduunka iyo beesha caalamka, waxaa naga go’an inaan taageerno soo kabashada Soomaaliya kaddib waqti dheer oo colaadi ay ku jirtay.
Agaasimaha hey’adda lacagta adduunka ayaa u mahadcelisay wadamada xubnaha ka ah hey’adda ee ansixiyay dhaqaalahaan, waxaa kale oo ay qirtay dadaalka wada shaqeeneed wadamada iyo hay’adaha lacagaha ku leh Soomaliaya sida Bangiga aduunka, Bangiga Horumarinta Afrika, Midowga Yurub, kooxda Paris iyo wadamada kale ee qeybta ka ah.
“Tani waxay hoosta ka xariiqaysaa aqoonsiga xubnaheena ee sida ay Soomaaliya xoogga u galisay ka go’naanteeda dhaqaalaha iyo dib u habeynta hey’adaheeda maaliyadda xili ay Soomaaliya ku jirtay marxalad adag oo caqabado ku wajahan yihiin, Soomaaliya waxay talaabo u qaaday soo xeridda bogga dayn cafinta iyo gaarida barta go’aan qaadashada, waxay awoodi doontaa hannaankaan kadib horumar dhaqaale oo ay ku jirto yaraynta faqriga.” Ayay hadalkeeda ku dartay Kristalina Georgieva.
Wasiirka Maaliyadda ee Xukuumadda Federaalka Soomaaliya Mudane Cabdiraxmaan Ducaale Beyle ayaa qoraal uu bartiisa soo dhigay soo dhaweeyay go’aanada wax ku oolka ah ee ka soo baxay hay’adda lacagta adduunka.
