Ciidamada nabadsugida Qaranka ayaa howlgallo ay maanta ka sameeyeen wadada isku xirta magaalada Muqdisho iyo gobolka Shabeelada hoose waxa ay kusoo qab qabteen inkabadan 200 oo ruux kuwaasoo qaarkood tuhun lagu soo qabtay halka tiro kamid ahna ay ciidamadu mudo ku daba jireen.
Howlgalkan oo lagu baarayay gawaarida dadweynaha ee isugu jira kuwa raaxada iyo xamuulkaba ayaa waxaa lagu joojinayay isgoyska Ex Control Afgooye halkaasoo ay ciidamadu hubinayeen gawaarida soo galeysa caasimadda iyo kuwa ka baxaya.
Ciidamada oo weli ku howlan kala saarida dadkaasi howlgalka maanta lagu soo qabtay ayaa waxa ay sii daayeen qaar katirsan dadka la qabtay oo si tuhun ah lagu soo qabtay hase yeeshee waxaa weli baaris ay ku socotaa qaar kamid ah dadka lagu eedeeynayo inay ku howlanaayeen falal amni daro ah.
Afhayeenka wasaaradda amniga Qaranka Maxamed Yuusuf Cusmaan ayaa sheegay in howlagaladan looga gol leeyhay sidii loo xaqiijin lahaa amniga magaalada Muqdisho loogana hor tegi lahaa kooxaha nabadda kasoo horjeeda.
