In ka badan 50 milyan oo qof oo ku nool gobolka Bariga Afrika ayaa la sheegayaa in sannadkan ay soo wajahday xaalad cunto yari ah.
Urur goboleedka IGAD ayaa Jimcihii sheegay, in dad gaaraya 300,000 oo ku nool Soomaaliya iyo Koonfurta Suudaan ay ku jiraan xaalado macaluuleed oo aad u ba’an.
Qiimayntan uu sameeyay urur goboleedka IGAD ayaa ah tii ugu darnayd ee ay hay’adaha Qaramada Midoobay, kuwa bini’aadantinimada iyo kuwa kale ee ka qeylo dhaamiyaan dhibaatada cunno yarida ee ka jirta gobolka ay sheegaan.
Qiimeyntan ayaa si gaar ah u khusaysa dalalka xubnaha ka ah Urur goboleedka IGAD.
Samantha Power, oo ah maareeyaha hay’adda horumarinta caalamiga ah ee Maraykanka, ayaa socdaal ku mareysa bariga Afrika si ay u soo bandhigto dhibaatada gaajada ee ka jirta gobolka, waxaana la filayaa in dhawaan ay booqato dalaka Itoobiya iyo Soomaaliya, halkaasi oo bulshooyinka qaar ay ku dhibaateysan yihiin Abaaro ka dhashay baaqashada afar xilli roobaad oo xiriir ah.
