Sida ay sheegeen Booliska dalkaasi Bakistaan, 22 qof ayaa ku dhimatay tira kalana way ku dhaawacmeen qarax ka dhacay xarun dowladeed oo ku taala waqooyi galbeed ee Bakistaan.
Xafiiska uu ka dhacay qaraxa ayaa ahaa mid laga qaato aqoonsiga dhalashada dalkaasi, waxaana la sheegay xilli ay socotay hawshaasi in goobta uu soo galay nin ay ku xernaayeen wax yaabaha qarxa kaas oo goobta isku qarxiyay kadib markii uu mooto kaga dagay meel aan ka fogayn xafiiska.
Qayb ka mid ah Taalibaanka Pakistan ayaa sheegtay in ay ka dambeeyeen qarxaasi kaas oo ay ku dhaawacmeen inta la og yahay ilaa Sodomeeyo qof oo rayid ah, waxaana la geeyay cusbitaalo ku yaala magaalada Mardan oo ah meesha uu qaraxa ka dhacay.
Weerarkani waa mid ka mid ah kuwii ugu darnaa tan iyo bishii 12 ee sanadkii 2014-kii markaas oo weerar lagu dilay 150 macalimiin iyo caruur isugu jira, kaas oo ka dhacay Peshawar.
Caadiyan xafiiska la qarxiyay waa mid safaf dhaadheer loo galo si looga qaato aqoonsiyada dalkaasi.
Booliisku waxay geerida ku sheegeen 22, inta badan dadka dhintay ama dhaawacmay waxay u badanyihiin dad shacab ah.
