Magaalada Jowhar ee Gobalka Shabeelaha Dhexe ayaa si weyn looga xusay munaasabadda 26-ka June oo ah maalintii ay gobollada Waqooyi xornimada ka qaateen gumeystihii Ingiriiska, kaasi oo ay ka qeyb galeen mas’uuliyiin ay ka midtahay Guddoomiye ku-xigeenka labaad ee Golaha Baarlamaanka Hirshabeelle Canab Axmed Ciise, maamulka Degmada Jowhar, kan Gobolka Shabeela Dhexe iyo xubno kale.
Ugu horey Guddoomiyaha maamulka Degmada Jowhar Cisman Maxamed Muqtaar, Duqa magaalada Jowhar Saalax Muudey iyo Guddoomiye ku-xigenka Gobalka Shabeelaha Dhexe Maxamed Cabdi Sheekh Xaandow ayaa si isku mid ah Hambalyo ku aadan xuska 26-ka June u diray guud ahaan Shacabka Soomaaliyeed
Guddoomiye ku-xigeenka 2aad ee Baarlamanka Hirshabeelle Canab Axmed Ciise ayaa bulshada Soomaaliyeed ugu baaqday inay xoojiyaan midnimada iyo ka qeyb qaadashada todobaadka xoriyadda dalka.
