Ku-simaha Guddoomiyaha Gobolka Benaadir ahna Guddoomiye ku-xigeenka maamulka iyo Maaliyadda ee Gobolka ayaa maanta furay kulan looga hadlayay kobcinta dhaqaalaha caasimadda, kaasi oo lagu qabtay Muqdisho.
Kulan oo ay ka qeyb galeen Madaxda Jaamacadaha Gobolka Benaadir, ganacsato, ururrada bulshada rayidka iyo xubno kale ayaa diirada lagu saaray dhisidda Madasha kobcinta dhaqaalaha gudaha oo ay iska kaashanaya Hay’adda ILO iyo madashan, kaasi oo isku xiraya ganacsatada, ururrada bulshada rayidka iyo dowladda Hoose Xamar.
Cabdiqaadir Muxudiin Axmed oo madasha hadal kooban ka jeediyay ayaa sheegay in Madashan ay ka koobantahay saddex qeyb oo kala ah bulshada rayidka, ganacsto iyo dowladda Hoose ee Xamar, isla markaana uu yahay mid lagu soo nooleeynayo kabayaashii dhaqaalaha ee dalka.
Hormuudka Jaamcadda SIU Prof Yaxye Cali Ibraahim oo ka mid ah ahaa mas’uuliyiintii Jaamcadaha ee kulanka lagu casuumay ayaa sheegay in tani ay gogol xaar u noqon doonto dhaqaalaha maxaliga ah ee dalka, isla markaana horseedeyso in la gaaro horumar dhanka dhaqaalaha ah.
Ku-simaha Guddoomiyaha Gobolka Benaadir ahna Guddoomiye ku-xigeenka Maamulka iyo Maaliyadda ee Gobalka Benaadir Ismaaciil Macalin Cabdi Guure ayaa sheegay in madashan ay u furantahay dhamaan ganacsatada Gobolka Benaadir.
“Dowladda Hoose ee Xamar, canshuur ayuu qaadaa, adeegna wuu ku qabtaa, in dadku ay talo ku yeeshaan waxkasta oo la qabanayo iyo kobcinta dhaqaalaha waa mid muhiim ah, marka waxaan u mahadcelinayaa hay’adda ILO iyo dadkii isku howlay in la sameeyo madal ay bulshada kaga kobcin karaan dhaqaalaha gudaha” ayuu yiri Ismaaciil Macalin Cabdi Guure.
Madasha kobcinta dhaqaalaha gudaha ayaa ah mid laga isticmaalo wadamada dhaqaalahooda soo koraya, waxaana dadkii ka hadlay ay tilmaameen inay tahay mid lagu kobcinayo dhaqaalaha dalka.
Sawir Qaade:- Jabiiba
