Koox hubeysan ayaa xalay magaalada Kampala ku toogtay dacwad ooge u dhalatay waddanka Uganda Kampala sida ay xaqiijiyeen saraakiisha booliska.
Joan Kagezi, ka shaqeyneysa kiisaska 13 qof oo lagu eedeeyay inay ku lug lahaayeen qaraxii ay kooxda Al-Shabaab ka geysteen magaalada Kampala 2010kii, waxaa toogtay niman saarnaa mootoxilli ay ku sii jeedday gurigeeda sida uu sheegay afhayeenka booliska magaalada kampala Patrick Onyango.
Bishii July 2010 qaraxyo ismiidaamin ah ayaa lala eegtay dad daawanayay ciyaayihii adduunka, weerarkaas oo ay ku dhinteen ku dhawaad 80 qof waxaa masuuliyaddiisa sheegatay kooxda Al-Shabaab.
Horraankii bishaan, maxkamadda sare ee waddanka Uganda ayaa bilowday dhagaysiga dacwad lagu soo oogay 13 qof oo lagu eedeeyay inay ku lug lahaayeen weerarkaasi, toddobo ka mid ah ragga la soo eedeeyay ayaa u dhashay waddanka Kenya, shan Uganda u dhalatay iyo hal qof oo Tanzaaniyaan ah. Dacwad oogeyaasha ayaa dadkaan ku eedeeyay inay ku lug leeyihiin falal isugu jira argagax galin, dilal iyo inay xubno ka yihiin koox argagixiso ah.
Bishii September, ciidammada ammaanka Uganda ayaa gacanta ku dhigay suumanka la isku qarxiyo iyo waxyaabo kale oo qarxa kaddib howl gal ay sameeyeen goobo looga shakiyay in ay Al-Shabaab ku dhuumanayaan oo ka mid ah magaalada Kampala. Tobbobaadkii hore dowladda Uganda waxay sheegtay inay xoojinayso ammaanka kaddib markii safaatadda Mareykanka ee Kamapala ay ka digtay weerar argagixiso oo laga fuliyo waddanka Uganda.
