Ku-simaha Guddoomiyaha Gobolka Banaadir ahna Guddoomiye Ku-xigeenka Maamulka iyo Maaliyadda Mudane Ciise Maxamuud Guure ayaa ka qeyb galay kulan lagu daahfuray mashruuca Kobcinta Maamulka kheyraadka Soomaaliya (SERP) iyadoo Madasha ay ku sugnaayeen mas’uuliyiin ka tiran dowladda Federaalka Soomaaliya, dowladaha xubnaha ka ah iyo madax ka socotay Bangiga Aduunka (World Bank).
Mudane Ciise Guure ayaa ugu horeyn Magaalada Muqdisho iyo Madasha kusoo dhaweeyay Madaxda Maamul Goboleedyada iyo kuwa Hey’addaha Caalamiga, asigoona sheegay in Mashruucan (SERP) uu yahay mid taageerayo xoojinta shan tiir oo dowli ah, oo ay ugu waaweyn yihiin seddexda qeybood ee kala ah:
• Maareynta Kharashka dowliga ah (PFM)
• Abaabulka dakhliga gudaha (DRM)
• Maareynta Hey’adaha Dowliga ah (PSM)
Ku-simaha Duqa Magaalada Muqdisho ayaa tibaaxay in Mashruucan ay maal-gelineyso World Bank uu taageero farsamo siinayo howl-wadeennada dowladda Soomaaliya labadeeda heer iyo Maamulka Gobolka Banaadir.
Sidoo kale waxa uu madasha la wadaagay in Maamulka Gobolka Banaadir uu haatan ku howlan yahay dhamaan siyaasadihii & hab – raacyada saldhiga u ah fulinta iyo ku dhaqanka nidaamka Maareynta Kharashka Dowliga ah (PFM), kaas oo ay ka farcamayaan daah-furnaanta Maaliyadda iyo Isla-xisaabtanka.
