Kulan looga arrinsanaayey sida ugu habboon ee Bulshadu uga qeyb qaadankaraan dib u dhiska Magaalada Baydhabo islamarkaasina uu soo qabanqaabiyey gudoomiyaha G/Baay ayaa lagu qabtay Magaalada Baydhabo.
Xafladan oo Qaaraan loogu uruurinayo horumarinta magaalada Baydhabo, waxaa si wadajir ah u soo qaban qaabiyey maamulka Gobolka Bay iyo gudiga horumarinta Degmada Baydhabo ee Danwadaag, waxaana Ka qeybgaley qaar ka mid ah Ganacasatada Magaalada Baydhabo.
Kulanka ayaa si gaar ah diiradda loogu saaray sidii waddooyin casri ah loogu dhisi lahaa magaalada Baydhabo islamarkaana dib u dayactir loogu sameeyn lahaa wadooyinka burbursan iyadoo bulshada lagu boorinayo iney ka qeybqaataan horumarinta magaalada Baydhabo.
Gudoomiyaha gobolka Baay mudane C/rashiid C/laahi Maxamed .iyo Maxamed Shariif “Kuwaarti” oo isaguna ka socoday gudiga hormarinta Degmada Baydhabo ee Danwadaag oo iyagu ka hadlay munaasabadaasi ayaa bulshada reer Baydhabo ku boorriyay iney hormuud ka noqdaan horumarinta magaaladaasi.
Gudoomiyaha Rugta ganacasiga maamulka Koofur Galbeed Axmed Macalin oo ku hadlaayey Afka Ganacasatada magaalada Baydhabo ayaa sheegay in ay muhiimtahay in bulshada ay isku tashato islamarkaasina ka qeybqaataan dib udhiska dalkooda hooyo.
