Kulankan ayaa waxaa looga hadlayay sidii umuliso dhaqameedyada xirfadooda kor loogu qaadi lahaa isla markaana ula shaqeyn lahaayeen xarumaha caafimaadka ayaa waxaa ka soo qeybgalay mas’uuliyiin ka tirsan wasaaradda caafimaadka dowladda Federaalka iyo tan dowlad goboleedka Koonfur galbeed ayaa maanta lagu qabtay magaalada Baydhabo.
Faadumo Sheekh Xasan oo kamid aheyd dadkii kulankan soo qaban qaabiyay ayaa sheegtay in hooyada Soomaaliyeed ay dhibaato badan kala kulanto xilliga umusha isla markaana si dhibaatadaasi loo yereeyo ay qasab tahay in la helo umuliso xirfad leh.
“Ujeedada laga leeyahay waxaa ay tahay isku xirka umuliso dhaqameedyada iyo shaqaalaha caafimaadka si loo horumariyo taranka caafimaadka isla markaana la helo ilomo caafimaad qaba iyo hooyo caafimaad qabta”, ayay tiri Faadumo.
Agaasimaha guud ee wasaaradda caafimaadka dowlad goboleedka Koonfur galbeed Isaaq Xasan oo kulanka ka hadlay ayaa ka codsaday umuliso dhaqameedyada in ay ku xirnaadaan xarumaha caafimaadka si loo badbaadiyo hooyada Soomaaliyeed.
Sidoo kulanka ayaa waxaa ka hadlay qaar kamid ah umuliso dhaqameedyada waxaana ay sheegeen in ay diyaar u yihiin in ay la shaqeeyaan xarumaha caafimaadka si ay aqoondooda u kororsadaan,ayagoo ku dooday in haweenka qaar ay ka cabsadaan Isbitaalada loona baahan yahay in la wacyigeliyo si ay u ogaadaan faa’idada ku jirta in hooyada foosha haysa ay ku umusho xarun caafimaad oo tayo leh.
Dalka Soomaaliya ayaa lagu tiriyaa in uu kamid yahay dalalka ugu badan marka ay timaado dhimashada hooyada iyo dhallaanka kaas oo loo aaneeyo la’aanta xarumaha lagu daryeelo hooyada iyo dhallaanka Soomaaliya.
