Kusimaha Guddoomiyaha Golaha Shacabka ahna Guddoomiye ku-xigeenka labaad ee golaa Mudane Mahad Cabdalla Cawad ayaa maanta kormeerkiisa koowaad waxa uu ku tegay Xarunta golaha Shacabka oo ah halka lagu qabto kulamada guud ee golaha Shacabka, halkaasoo hadda uu ka socdo howlo dib u dayactir ah oo bilicda dhismaha lagu soo celinayo.
Kusimaha Guddoomiyaha golaha shacabka ayaa kormeerkiisa waxaa ku wehliyay habdhowraha golaha Shacabka Xildhibaan Maxamed Cabdullaahi Xasan Nuux, waxaana uu kormeer ku sameeyay dhamaan qeybaha ay xaruntu ka koobantahay.
Guddoomiye ku-xigeenka waxa uu Injineerada xarunta dhiseysa uu ka dhageystay warbixin ku saaabsan halka howsha dib u dayactirka ah ay mareyso.
Sidoo kale Kusimaha Guddoomiyaha golaha Shacabka ahna guddoomiye kuxigeenka labaad ee golaa Mudane Mahad Cabdalla Cawad ayaa kormeerkiisa labaad ku sameeyay dhisme cusub oo laga dhisayo xarunta Guddoonka iyo Guddiyada ee Villa Hargeysa, taas oo lagu qaban doono kulamada guud ee golaha inta uu socdo dhismaha guud ee xarunta weyn ee golaha shacabka oo dhisamaheeda uu si rasmi ah u bilaaban doono dabayaaqada sanadkan.
Ku-simaha Guddoomiyaha Golaha Shacabka ahna Guddoomiye ku-xigeenka labaad ee golaha waxa ay Injineerada dhismaha wada la wadaageen nashqadda dhismaha iyo qeybaha uu ka koobnaan doono oo ay ka mid tahay sidii marka dhismaha uu dhamaado bilaha soo aadan loo heli lahaa meel Warbaahinta ay ka tabin karto wararka golaha shacabka oo dhismaha gudaheeda ah.
Ugu dambeyn Ku-simaha guddoomiyaha golaha Shacabka ayaa kormeeray xafiisyo cusub oo laga hir gelinayo gudaha xarunta Villa Hargeysa, kuwaas oo loogu tala galay in ay ku shaqeeyaan guddiyada golaha shacabka.
Mudane Mahad Cabdalla Cawad oo ah Kusimaha guddoomiyaha golaha Shacabka ahna guddoomiye kuxigeenka labaad ee golaha oo kormeerka ka dib isla goobta kula Warbaahinta Qaranka ayaa sheegay in ujeedka kormeerka uu yahay sidii ay u ogaan lahaayeen sida uu u socda dhismaha, isagoo intaa ku daray inay uu kulamo la qaatay shaqaalaha iyo ciidamada oo uu ka dhageystay xaaladda ay ku suganyihiin, isla markaana uu kala hadlay helida xuquuqaadkooda.
Kormeerkan Kusimaha Guddoomiyaha golaha Shacabka ahna guddoomiye kuxigeenka labaad ee golaha uu maanta ku tagay dhismooyinkan xarumaha Golaha Shacabka ayaa waxa uu qeyb ka yahay dar dar gelinta howlaha Golaha uu u hayo shacabka.
