Guddoomiyaha Gobolka Banaadir ahna Duqa Magaalada Muqdisho Mudane Cumar Maxamuud Maxamed (Cumar filish) iyo Guddoomiye ku-xigeenka Amniga iyo siyaasadda Maxamed Cabdulaahi (Tuulax) ayaa ka qeyb galay munasabad uu xil kula wareegayay Guddoomiyaha cusub ee Degmada Xamar Jajab Mudane Maxamed Cabdi Axmed.
Xafladda xilwareejinta oo ay ka qeyb galeen qeybaha bulshad iyo maamulka Degmada ayaa intii ka hadashay waxa ay si wadajir ah u xuseen in dadka ku dhaqan Degmada Xamar Jajab ay yihiin bulsho Nabadda jecel, ayna diyaar u yihiin la shaqeynta Guddoomiyaha cusub.
Guddoomiyaha Degmada Xamar Jajab mudane Maxamed Cabdi Axmed ayaa tilmaamay in uu xoogga saari doono ka shaqeynta Nadda, Horumarinta iyo isdhexgalka bulshada, isagoo bulshada ka codsaday inay la shaqeeyaan.
Guddoomiye ku-xigeenka Amniga iyo siyaasadda mudane Maxamed Cabdulaahi (Tuulax) ayaa xusay in shacabka iyo Maamulka looga fadhiyo xoojinta wada shaqeynta dhexdooda ah, si looga hortago falalka liddiga ku ah amniga.
Guddoomiyaha Gobolka Banaadir ahna Duqa Magaalada Muqdisho Mudane Cumar Maxamuud Maxamed (Cumar filish) ayaa kula dar daarmay Guddoomiyaha cusub ee degmada in uu si hufan u guto waajibaadka loo igmaday, isagoo Alle uga baryay in uu u fududeeyo howlaha horyaalla.
