Maamulka Isbitaalka Madiina ayaa faahfaahin ka bixiyay xaaladda caafimaad ee dhaawacyada ku jira isbitaalka ee ay waxyeelada ka soo gaartay weerarkii Argagixisanimo ee maleeshiyaadka Al-Shabaab ay ku qaadeen Hotelka Saxafi ee magaalada Muqdisho.
Inta badan dadki ku dhaawacmay weerarkii Hotel Saxafi ayaa la dhigay isbitaalka Madiina, kuwaasi oo tiradoodu gaareyso 30 qof, waxaana inta la ogyahay isbitaalka ku dhinta labo qof, shan kale guryahooda ayaa dib loogu celiyay, kadib markii ay heleen baxnaanin caaafimaad, waxaana haatan isbitaalka jiifa 23 oo xaaladooda ay aad u liidato.
Agaasimaha Isbitaalka Madiina Dr Maxamed Yuusuf oo la hadlay Warbaahinta ayaa sheegay in bukaanada iminka la jiifay qaarkooda ay xaaladooda aad u liidato, halka kuwa kale uu tilmaamay in xaaladooda caafimaad ay xooga ka yara fiicantahay sida markii hore ay ahaayeen.
“Ilaa iyo shan saac maanta dhaawacyo ayaa la keeneyay isbitaalka, 25 ayaan jiifinay, shan kale guryahooda ayaa dib loogu celiyay, labo qof ayaa dhaawacyada u dhintay, inta badan dadka dhaawac ah, waxa ay u badnaaneeyn dad jab un soo gaaray” ayuu yiri Dr Maxamed Yuusuf.
