Maamulka Jaamacadda SKY ayaa maanta xaflad qalin jebin ah u sameeyay 55 arday dhameystay kuliyadaha kala duwan ee Jaamacadda, kaasi oo lagu qabtay magaalada Muqdisho.
Munaasabadan shahaadooyin lagu guddoonayay 55 arday oo ah dufcaddii 2aad ee dhameysatay heerka Diplomaha ee kuliyadaha kala duwan ee Jaamacadda SKY ayaa waxaa ka qeyb galay Waalidiin, arday, maamulka iyo macalimiinta Jaamacddda iyo marti sharaf kale oo xafladda lagu casuumay, iyadoo xubnihii kala duwanaa ee xafladda ka hadlay ay si wada jir ah hambalyo iyo bogaadin u jeediyeen ardayda maanta xafladda loo sameeyay.
Maxamed Ibraahim Xasan oo ka mid ah maamulka Jaamacadda SKY ayaa sheegay in ardayda maanta qalin badalaneysa lagu dhiiri gelinayo inay qaataan shahaadooyin, ayna Jaamacaddu fursad u siisay inay halkooda ka sii wataan waxbarashada.
Prof Β Maxamuud Siraaji Canshuur oo ahaa Madaxii kuliyada caafimaadka ee Jaamacadda lafoole ayaa ardayda ku booriyay inay ka faa’iideystaan cilmiga ay barteen, isla markaana ay ugu adeegaan bulshadooda.
Abwaan Mahad Xasan Fareey oo ka mid ah aqoonyahankii xaflada lagu casuumay ayaa goobta ka tiriyay tix gabay ah oo uu kaga hadlayay ahmiyadda ay waxbarashada u leedahay dhallinta, isagoo ku maanta la guddoonsiiyay shahaadooyinka ku booriyay inay u istaagaan sidii ay ugu adeegi lahaayeen bulshadooda.
Cumar Muxudiin Cabdulle Madaxa xiriirka bulshada ee Jaamacadda SKY ayaa tilmaamay in Jaamacadda ay xoogga saareyso tayaynta tacliinta sare ee dalka, isagoo bulshada ka codsaday inay dhiiri geliyaan ardayda wax baraneysa.
Qaar ka mid ah ardayda la gudoonsiiyay shadaadada dhiiri gelinta ah diplomada ayaa Warbaahinta Qaranka uga maray dareenkooda maanta.
Guddoomiyaha Jaamacadda SKY ee magaalada Muqdisho Maxamed Macalin Xasan oo soo xiray xafladda ayaa sheegay in ujeedka munaasabadda ay tahay labo qeyb oo kala ah soo xirida siminaar loo qabtay ardayda Jaamacadda iyo in shahaadooyin diplomaha ah la gudoonsiiyo qaar ka mid ah ardayda..
Ugu dambeyntii waxaa shahaadooyin la guddoonsiiyay qaar ka mid ah ardayda baratay kuliyada kala duwan ee Jaamacadda SKY ay bixiso.
