Madaxweynaha Soomaaliya Mudane Xasan Sheekh Maxamuud oo si rashmi ah u furay shir Madaxeedka IGAD ayaa sheegay in shirkan uu ahmiyad ugu fadhiyo guud ahaan shacabka Soomaaliyeed, Soomaaliyana ay ku guuleysatay xaqiijinta amniga dalka.
“Kulan Madaxeedka IGAD ee ka furmay Muqdisho waxay daliil u tahay in waddamada gobolka iyo beesha caalamka ay garowsadeen horumarka ay Soomaaliya ka sameyneyso dhinaca dowlad dhisidda iyo nabad soo celinta, isla markaana Soomaaliya ay dib u soo ceshatay sumcaddii iyo sharaftii ay ku lahayd beesha caalamka’’, ayuu yiri Madaxweynaha.
Ra’iisul Wasaaraha Ethiopia Hailemariam Desalegn oo shirka ka hadlay ayaa sheegay in horumarka ay ku talaabsaday Soomaaliya ay guul u tahay wadamada gobolka, isla markaana ay ka shaqeynayaan sidii Soomaaliyada arrimaha amniga gacan looga siin lahaa.
Madaxda shirka ka qeyb gashay waxaa ka mid ah Madaxweynayaasha Kenya, Uganda iyo Ra’iisul wasaaraha Ethiopia, iyadoo Madaxweynaha Jamhuuriyadda Jabuuti Mudane Ismaaciil Cumar Geelle ay cilad ku timid diyaaraddii siday, marka ay soo gaartay hawada Soomaaliya, taasi oo keentay in lagu celiyo dalka Jabuuti.
Madaxweynaha Sudan Cumar Xasan Al-bashiir iyo Madaxweynaha Suudaanta Koonfureed Silva Kiir ayaa ka maqan shirka, iyadoo ay ka joogaan Wakiilo ka kala socda labada dal.
Madaxda Waddamada Xubnaha ka ah Urur Goboleedka IGAD ayaa ah markii ugu horreysay ay Magaalada Muqdisho ku qabtaan shir Madaxeedkooda, tan iyo markiii ururkan la aasaasay 1986-kii.
