Guddoomiyaha Maxkamadda Darajada Koowaad ee Ciidamada Qalabka Sida ee Soomaaliya Gaashaanle Sare Xasan Cali Nuur “Shuute” oo maanta Xafiiskiisa kula hadlay Warbaahinta Qaranka Soomaaliyeed ayaa faahfaahin ka bixiyay Socdaal Shaqo oo Isaga iyo Guddoomiyaha Maxkamadda Sare Ee Ciidamada Qalabka Sida Gen Liibaan Cali Yaroow ay ku tageen magaalada Qaahir ee Dalka Masar.
G/Sare Xasan Cali Shuute ayaa Sheegay in kulan gaar ah oo fikrado la isku dhaafsaday ay la qaateen Guddoomiyaha Hay’adda Garsoorka Ciidamada Qalabka Sida Sareeya Gaas Camaad Cabdalcasiis oo ay wehliyaan Xeer ilaaliyaha Guud Maxkamadda Ciidamda Qalabka Sida Masar iyo guddoomiyaha Maxkamadda Sare ee Ciidamada Dalka Masar.
“Socdaal Shaqo oo qaatay hal Isbuuc ayaan aniga iyo Gen Liibaan Cali Yaroow ku tagnay Qaahir kadib markii aan casuumaad rasmi ah ka helnay Dowladda Masar, wuxuu ahaa kulankeenii ugu horreeyay ee dhexmaray madaxda ugu Sarreysa Maxkamada Ciidamada Qalabka Sida Ee Soomaaliya iyo Masar, si wanaagsan ayay noogu soo dhaweeyeen garoonka Diyaaradaha Magaalada Qaahir, sida taariikhda ku xusan Masar waxa ay safka hore uga jirtaa dalalka ugu horreeya dhinacayada xeerarka garsoorka madaama Xeerarka u dagsan Masar la dajiyay 1882-Kii, halka Xeerarka Soomaaliyana la dajiyay 1963-Kii, waxaan ka wada hadlanay sidii aan isku dhaafsan laheyn aragtiyo la xiriira qaabka maanta ay u shaqeeyaan Garsoorka labada dal” ayuu Yiri G/Sare Shuute.
Guddoomiyaha Maxkamadda Darajada Koowaad ee Ciidamada Qalabka Sida G/sare Xasan Cali Nuur Shuute oo hadalkiisa sii wata ayaa sheegay in Guddoomiyaha Hay’adda Garsoorka Masar uu kulanka ka ballanqaaday in Qubarro Garsoorka ku xeeldheer ay u soo diri doonaan Soomaaliya, si Garsoorka Maxkamadda Ciidamada Qalabka ay tababaro u siiyaan, islamarkaana Masar ay gacan uga geysato talooyin la xariira haddii wax laga badalayo qodo kamid ah xeerarka u dagsan Maxkamadda Ciidamada.
“Dowladda Masar oo ah dal Islaam ah meelo badana aan iska waafaqsanahay xeerarka u dagsan waxaan ka codsanay in ay gacan dhinaca farsamada ah naga siiyaan waxkabadalista Xeerarka Garsoorka Maxkamadda Ciidamada Qalabka Sida ee Soomaaliyeed si aan ula jaanqaadno xeerarka casriga ah ee maxakamada Ciidamada dunida, maadaama xeerka u dagsan maxkamadda ciidamada aan wax laga badalin tan iyo wixii ka dambeeyay 1963-kii, wey naga aqbaleen in howshaas gacan ay naga siiyaan, sidoo kalana noo tababaraan shaqaalaha loo qaadanyo in ay ka shaqeeyaan maxkamadda ciidamada kahor inta aysan shaqo galin” ayuu Yiri Gaashaanle Sare Shuute.
Ugu dambeyntii Guddoomiyaha Maxkamadda Darajada Koowaad ee Ciidamada Qalabka Sida Gaashaanla Sare Xasan Cali Shuute ayaa sheegay in Madaxdu ay isku raaceen in lasii joogteeyo kulamada labada dhinac, ayna isdhaafsadaan warbixinada la xiriira waxyaabaha casriga ah ee kusoo kordha Xeerarka lagu maamulo maxkamadaha Ciidamada Qalabka Sida.
