Allaha u naxariiste waxaa magaalada Hargeysa ku geeriyooday Abwaan Cabdullaahi Diiriye Cali “Sooraan”, waxaana arrintaasi ka tacsiyadeeyay Madaxda Wasaradda Warfaafinta iyo fanaaniinta Hobollada Qaranka ah ee Waaberi.
Wasiirka Warfaafinta, dhaqanka iyo dalxiiska ee Xukuumadda Federaalka ah ee Soomaaliya mudane Maxamed Cabdi Xayir “Maareeye” iyo madaxda kale ee Wasaaradda ayaa si wada jir ah uga tacsiyadeeyay ehelada iyo qaraabada uu ka geeriyooday Allaha u naxariistee Marxuum Cabdullaahi Diiriye Cali “Sooraan” oo ah Abwaan Soomaaliyeed, isla markaana suugaan kala duwan soo curiyay, waxayna Alle uga baryeen in uu Janada ka waraabiyo.
Allaha u naxariistee waxaa sidoo kale Sweden ku geeriyooyatay fanaanada Saciido Cabdi Muuse oo ka mid ahayd aas aasayaashii Fanaaniinta kooxda Heegan ee Ciidanka booliska Soomaaliyeed.
Madaxda Wasaaradda Warfaafinta ayaa tacsi la mid ah u dirtay ehelada iyo saxaabta ay ka geeriyootay Marxuum Saciido Cabdi Muuse oo dalka Sweden ku geeriyootay.
Gaashaanle Aadan Axmed Cumar “Aadan biid” oo ah taliyaha kooxda Heegan ayaa tacsi u diray Qaraabada iyo ehelada ay ka geeriyootay Marxuum Saciido Cabdi Muuse oo ka mid ahayd aas aasayaasha fanaaniinta kooxda Heegan.
