Madaxweynaha Jamhuuriyadda Fedraalka Soomaaliya mudane Xasan Sheekh Maxamud ayaa sheegay in iskaashi dhexmara dowladda, maamulgoboleedyada iyo Shacabka ay keeni karto guul ay gaarto dowlkadda Federaalka Soomaaliya.
Madaxweynaha oo shalay meel fagaare ah kala hadlayay shacabka ku nool degmada Diinsoor ayaa hoosta ka xariiqay in guul ay gaarto dowladda ay ku imaankarto iskaashi dhexmara shacabka. Dowladda iyo maamulgoboleedyada dalka.
“Shabaab waa urur isu habarwacday, oo intii dambiilayaasha aheyd ee adduunyada dambiga ka soo gashay ayaa meeshaan loogu yeeray, intii Soomaaliya dhexdeeda dadka la noolaan weyday ayaa iyaguna gooni usoo baxeen, labadaas kooxood oo isbaheystay ayeey shabaab ka koobnaayeen, sababta ay dambiilayaasha dalkooda ka soo cararay ay dalkeena u yimaadeenna waa in meeshan aysan dowladnimo iyo maamul xoog badan uusan ka jirin” ayuu yiri madaxweyne Xasan Sheekh Maxamuud.
Madaxweynaha ayaa sidoo kale ka hadlay yoolka ay dowladdu higsaneyso, isagoo xusay in dadaal iyo iskaashi dhexmaray dowladda, maamul goboleeyada iyo shacabka ay ku timid guushan, wuxuuna hoosta ka xariiqay in dowladnimada ay ku dhismeyso xoogga iyo xoolaha oo la isu geeyo.
