Madaxweynaha Jamhuuriyadda Federaalka Soomaaliya Mudane Maxamed Cabdullaahi Maxamed Farmaajo ayaa martiqaad u diray Madaxda Dowlad Goboleedyada xubnaha ka ah Dowladda Federaalka Soomaaliya si ay uga soo qeybgalayaan shir wadatashi ah oo ka dhacaya magaalada Muqdisho 28ka Oktoobar, 2017.
Shirkaas ayaa looga arrinsan doonaa hawlo muhiim ah oo horyaalla Qaranka, ayna ugu horreyso sidii musiibadii Qaran ee ka dhacday Magaalada Muqdisho 14 kii bisha Oktoobar 2017 loogu beddali lahaa midnimo Qaran. qodobada kale ee diirada lagu saari doono shirkaan waxaa kamid ah sidii loo xoojin ahaa wadashaqeynta Dowladda Federaalka iyo Dowlad Goboleedyada xubnaha ka ah.
Sidoo kale, waxaa shirkaas looga wada hadli doona arrimo muhiim u ah hanaanka dowladnimada Soomaaliya oo ku jirta marxalad soo kabasho ah. qodobadaan ayaa ah kuwa fulintooda iyo hirgalintoodu ay u baahan tahay wadajir iyo wadashaqeyn, waxaana ka mid ah dardargelinta nabadeynta Dalka, horumarinta hannaanka federaalaynta, dib u eegista dastuurka, habka qeybsiga kheyraadka Dalka iyo geeddi socodka doorashada 2020.
Martiqaadkaan ayaa kusoo beegmaya iyadoo dhawaan Madaxweynaha Jahmuuriyadda Federaalka Soomaaliya uu ku dhawaaqay Dagaal ka dhan ah Maleeshiyaadka nabad diidka ah ee Al shabaab kaasoo looga saarayo deegaanada ay kaga sugan yihiin Gobolada Dalka.
Shalay ayay ahyd markii Madaxweyne Mudane Maxamed C/laahi Maxamed Farmaajo uu Socdaal ku tagay Xeryo lagu tababaro Ciidamada Xoogga Dalka Soomaaliya kuwaasoo uu kala hadlay difaaca Dalka iyo dabar goynta Maleeshiyaadka Al shabaab.
