Shirkani lagu heshiisiinaayo Beelo Walaalo ah oo ku dagaalamay deegaanada ka tirsan gobolka Shabeelaha Hoose ayaa maanta ka furmay degmada Afgooye ee gobolka Shabeelaha Hoose waxaana ka qeyb galay mas’uuliyiin katirsan dowlada dhexe ee Soomaaliya, Madaxweynaha Koonfur galbeed iyo Waxgarad ka kala socday dhinacyadii la heshiisiinaayay.
Furitaanka shirkan ayaa waxaa ka hadlay guddoomiyaha gobolka Shabeelaha Hoose C/qaadir Maxmed Nuur siidii isagoo sheegay in baahi weyn loo qabo dib u heshisiinta dadka wada degan gobolka Shabeelaha Hoose.
Wasiirka Ganacsiga iyo Dekedaha Maamulka Koonfur-galbeed C/laahi Sheekh Xasan ayaa kulanka ka sheegey in ka wasiir ahaan uu diyaar u yahay isla markaana daboolaan baahi kasto oo shacabku ay u qabaan arimaha horumarinta.
Madaxweynaha maamulka Koonfur-galbeed Shariif Xasan Sheekh Aadan oo shirka si rasmi ah u furay shirka ayaa ku baaqay in dadka walalaha ah ay qaataan nabada iyo dib u heshiisiinta si loo gaaro xasilooni waarta taas oo dan u ah dadka Soomaaliyeed.
Xildhibaan Maxmed Cumar Dalxa oo ku hadlayaay magaca xubnaha Baarlamanka Federaala Soomaaliya ayaa dhankiisa bogaadiyaay howlaha dib u heshiisiinta.
Geba gebada shirka ayaa la filaya in laga soo saaro qodobo ku saabsan waxyaahihii ka soo baxay shirka iyo sidii loo dhaqan gelin lahaa.
