Wafdigan ka socday beesha caalamka gaar ahaan Midowga Yurub waxaa qayb ka ahaa Safiirka Talyaaniga ee Soomaaliya, Safiirka Sweden u fadhiya dalkeena iyo xubno ka tirsan xafiiska Midowga Yurub ee Soomaaliya.
Wafdiga waxaa ku soo dhaweeyay Aqalka Madaxtooyada Puntland Madaxwaynaha Puntland Mudane Siciid Cabdulaahi Dani oo ay weheliyaan xubno ka tirsan Madaxtooyada Puntland iyo Golaha Wasiirada.
Madaxda ka socotay Beesha Caalamka iyo Madaxwaynaha Puntland oo ay weheliyaan Wasiirada Warfaafinta, Arrimaha Gudaha iyo qorshaynta Puntland ayaa waxay yeesheen shir gaar ah oo ay albaabadu u xirnaayeen warbaahintuna dibad joog ka ahayd .
Shirka laba geesoodka ah ayaa diiradda lagu saaray sida lagu sheegay qoraal kooban oo ay soo saartay Madaxtooyada Puntland, xaaladda guud ee dalka gaar ahaan habkii loo heli lahaa hanaan doorasho oo la isla wada ogolyahay iyo sidii ay Puntland qayb uga noqon lahayd shirka la doonayo in lagu dhammaystiro tabashooyinkii ka soo laabtay Heahiiskii 17kii September.
Imaanshaha wafdiga ka socday Beesha Caalamka ee Garoowe ayaa ku soo aadayo, iyadoo Muqdisho uu shir uga socdo Madaxda Dowlad Federaalka Soomaaliya iyo Dowlad Golabeedyada dalka iyo Gobalka Banaadir ayna ka maqan yihiin Madaxda Maamulada Puntland iyo Jubbaland waxaana maanta markale War qoraal ah oo ka soo baxay Madaxtooyada Qaranka Madaxda Puntland iyo Jubbaland looga dalbaday inay ku soo biiraan shirka lagu go’aaminayo masiirka doorasho ee dalka.
