Madaxweynaha Jamhuuriyadda Soomaaliya ayaa maanta xarigga ka jaray Isbitaalka De Martino ee ciidammada Naafada Xoogga dalka Soomaaliyeed oo ku yaalla degmada X/weyne ee gobolka Banaadir.
Isbitaalka De Martiino, waxaa la dhisay 1910-kii, hal qarni ka badan ayuu jiraa, waxaa lagu daweyn jiray Ciidammada Qalabka Sida Naafadooda.
Isbitaalka waxa la dhisay hadda qeyb ka mid ah oo si casri ah loo qalabbeeyey, qeybta bukaan socod eegtada iyo qeybaha kale ee uu leeyahay Isbitaal Casri ah, dhismahan waxaa soo abaabushay hey’adda houmarinta haweenka ee Iida oo gacan ka heleysa hey’ado kale iyo dowladda Talyaaniga.
Madaxweynaha Jamhuuriyadda Soomaaliya, Mudane Xasan Sheekh Maxamuud, ayaa xarigga ka jaray Isbitaalka De Martiino oo ku yaalla degmada X/weyne, madaxwyenuhu waxa uu soo kormeerray qeybahaasi cusub oo si simman ugu adeeggi doonna shacabka Soomaaliyeed iyo ciidammada Qalabka Sida guu ahaan.
Munaasabadda Furitaanka, madaxweynaha, Wasiirka Difaaca, wasiir ku xigeenka Caafmaadka, taliyeyaasha ciidammada Qalabka sida oo dhan, guddoomiyaha gobolka Banaadir ahna duqa Muqdisho, hoggaanka caafmaadka ee Xoogga dalka, madaxda hey’adda Iida iyo hey’adaha kale ee gacanta ka heystay Isbitaalka.
Guddoomiyaha gobolka Banaadir, wasiir ku xigeenka Caafmaadka, ayaa labaduba sheegay in guul weyn ay tahay in dowladdu ay taageerto mashruucaan ay dad Soomaaliyeed ku dhiseen Isbitaalkii Ciidanka Naafada haddaba bulshada dhan u adeeggi doono.
Taliyaha ciidammada Xoogga dalka Soomaaliyeed, Maxamed Aadan Axmed, ayaa maamulka Isbitaalka kula dardaarmay in ahmiyadda koobaad ay siiyaan Naafada Xoogga dalka ee mudada dheer soo hayey Isbitaalkan.
Wasiirka Gaanshigga Soomaaliya, Cabdulqaadir Sheekh Cali Diini, ayaa sheegay in loo baahan yahay in loo wada istaagi sidii bulshadu isugu tashan lahayd, waxa uu si weyn ugu mahadceliyey ciidanka Naafadda Xoogga dalka oo la’aantood aan la gaari lahayd horumarka uu sameeyey Isbitaalka.
Madaxweynaha Jamhuuriyadda Soomaaliya, Mudane Xasan Sheekh Maxamuud, ayaa u mahadceliyey ciidammada hey’adda Iida, hey’adihii gacan siiyey iyo dowladda Talyaaniga, sidoo kale waxa uu sheegay madaxweyne Xasan Sheekh in muhiim ay tahay isku tashiga bulshada.
Madaxweynaha Jamhuuriyadda, Xasan Sheekh Maxamuud, ayaa sheegay in mudnaan gaar ah la siiyo ciidammada Naafada Xoogga dalka Soomaaliyeed.
Madaxweynaha Soomaaliya, ayaa xusay in uu sidiisa u taagnaanayo magaca Isbitaalka ee De Martiino, maadaama uu ka mid yahay Taariikhda dalka uu leeyahay ee muddo dheer soo jirtay.
Isbitaalka, hadda waxa uu u adeeggayaa dhammaan shacabka Soomaaliyeed, waxaana mid ka mid ah guulaha Soomaaliya ay gaartay afartii sanno ee la soo dhaafey, dhinaca caafmaadka iyo dib u dhiska qeybaha Isbitaallada dalka, gaar ahaan caasimadda, hey’adda Iida, ayaa madaxweyne Xasan Sheekh guddoonsiisay Billad ay ku xushmeyneyso ee taageeriddii Isbitaalka.
