Madaxwaynaha dowlad gobaleedka Puntland Saciid Cabdullaahi Deni ayaa maanta xilka u kala wareejiyey Madaxwayne ku xigeenkii hore ee Puntland Axmed Cismaan Cilmi Karaash iyo Madaxwayne ku xigeenka cusub ee dhawaan la soo doortay Ilyaas Cismaan Lug Atoor.
Xafladan xilwareejinta oo ka dhacday gudaha Madaxtooyada Puntland ee Garoowe ayaa waxaa goojoog ka ahaa Wasiiro kala duwan, Howlawadenada Xafiisyada Madaxtooyada Puntland iyo xubno kale.
Madaxwayne ku-xigeenkii hore ee Puntland Axmed Cismaan Cilmi Karaash ayaa u hambalyeeyay Madaxwayne ku xigeenka cusub, xilli uu xusay in uu yahay shaqsi fahamsan shaqada Xafiiska iyo waxa looga baahan yahay.
Ilyaas Cismaan Lug Atoor Madaxwayne ku xigeenka cusub ee Puntland ayaa dhankiisa ka mahadceliyay shaqadii wanaagsanayd ee uu soo qabtay mudadii uu Joogay Xafiiska Madaxwayne ku xigeenkii hore ee Puntland.
Madaxwaynaha Puntland Mudane Siciid Cabdulaahi Dani ayaa u mahadceliyay Madaxwayne ku xigeenkii hore Axmed Karaash sidoo kalana kula dardaarmay Madaxwayne ku xigeenka cusub in uu shaqada Xafiska halkeedii ka sii wado.
