Maxkamad ku taala dalka Senegal ayaa xabsi daa’in ku xikuntay madaxweynihii hore ee dalka Chad Hissene Habre kaddib markii lagu helay dambiyo ka dhan ah bani’aaddanimada.
Dambiyada lagu helay waxaa ka mid ah tacaddiyo ka dhan ah aadanaha, jirdil iyo dambiyo dagaal iyo addoonsi, iyadoo ay ku marqaati fureen ilaa 90 qofood.
Dacwad oogaha maxkamadda ayaa dalbaday in Habre xabsi daa’in lagu xukumo, taa oo uu ku mutaysanayo dambiyo la sheegay in ay gaysteen ciidamo boolis ah oo gaar ah, muddadii uu xilka hayay intii u dhaxeysay sanaddihii 1982 iyo 1990, laakiin eedaymahaas wuu diiday.
Habre ayaa laga qabtay Senegal 2013 halkaas oo uu dibad joog ku ahaa, kaddib markii xilka laga tuuray 1990-ki
Waa markii ugu horreysay oo madaxweyne Afrikaan ah lagu maxkamadeeyo dal Afrikaan ah, isagoo loo haysto dambiyo ay ka mid yihiin jirdil, kuwa dagaal iyo kuwa ka dhan ah bini’aadannimada.
