Kulankan soo dheweynta ayaa waxaa ka qeyb galay xubno ka tirsan labada gole ee dowladda, Guddoomiyeyaasha Gobollada Benaadir iyo Shabeelaha dhexe, siyaasiyiin, duubad, odoyaasha dhaqanka iyo qeybaha bulshada ayaa lagu qabtay Muqdisho.
Guddoomiyeyaasha Gobollada Banaadir iyo Shabeelaha Dhexe Xasan Maxamed Xuseen Muungaab iyo Cali Xuseen Guudlaawi oo ugu horey kulanka soo dhaweynta ka hadlay ayaa si wada jir ah u tilmaamay inay soo dhaweynayaan malaaqa, ayna diyaar u yihiin in ay la shaqeeyaan.
“Magaalada Muqdisho beryahan dhan waxa ay diyaar u tahay iyo maamulka gobolka banaadir , maamul ahaan iyo ciidamada nabad gelyada gobolka, dhamaan waxaan heegan u nahay in aan soodhaweyno, fududeyno, isku daba ridno, xafladaha is daba jooga ah ee lagu soo dhaweynayo malaaqa, malaaq Cali, Xamar iyo Xamardaye, anagana doorkeena, waan qaadaneynaa, Malaaqa xamar iyo xamardaye soo dhawoow ayaan ku leenahay, xamardaye ayaa nahay hadaan nahay shabeelaha dhexe, waan ku faraxsanahay duubkaaga, gogolkasta oo laguu dhigaayana diyaar ayaan ka nahay, garabkaaga ayaana taaganahay, Malaaq soo dhawoow Malaaq soo dhawoow”.
Madaxweynihii hore ee Soomaaliya, Cali Mahdi Maxamed , Ra’iisul wasaarihii hore ee xilligii KMG ah, Cali Maxamed Geeddi iyo siyaasiga Aadan Maxamed Cali ayaa si wada jir ah u tilmaamay in Malaaqa uu ku soo beegmay xilli loo baahnaa.
“Waxaad ku soo aaday Soomaaliya maalinay u baahantahay, dad gacanta u taaga, oo u yeera, oo yiraahda Soomaaliyeed, isu kaalaya, Waxay u baahantahay Soomaaliya dad adiga oo kale ah oo dhinac culimo ah, oo dhinac isimo ah, Soomaaliya waxa ay u baahantahay maalinteedii baad timi, Qaabka loo caleemo saaray ee maanta loogu xafladeynayo oo bilowga soo dhaweyntiisa aan ka arkeyno, inay daliil u tahay, in uu noqon doono mid anfaca dalka, dadka iyo diinta, ilaahay baan u baryeynaa in uu u fudeeyo xilka, waana la garab galeynaa, waxaa la rabaa raggii duubay, dowladda iyo dhamaanteen, ninkaan dantiisa gaarka ah in laga warqabo oo meel la dhigo”
Malaaq Cali Malaaq Maxamed Malaaq Wehliye oo isna goobta ka hadlayaa sheegay in uu ka shaqeyn doono dib u heshiisiinta iyo nabadda
“Waxaan ka shaqeyneynaa haddii uu Alle yiraahdo Nabadda, nabadgelyada, dib u heshiisiinta, qaranka Soomaaliyeed, si loo helo nabad iyo in la helo xal waara, maxaa yeelay haddii aan nabad la helin nolol ma jireyso, marka waxaan kaloo ugu baaqayaa Ummadda Soomaaliyeed meelkasta oo ay joogaan, aan u dirayaa nabad gelyo, dib u heshiisiin, wanaag, barwaaqo, isu keenid Ummaddan sidii la isu keeni lahaa, waxan kaloo Ummadda ugubaaqayaa dib u heshiisiin”
Xildhibaan Cumar Maxamed Maxamuud ayaa sheegay in kan Xildhibaan ahaan ay soo dhaweynayaan Malaaqa, ayna diyaar u yihiin in ay la shaqeeyaan.
“Malaaq soo dhawooe, aniga oo ku hadlaya magaca golaha baarlamaanka federaalka ah ee Soomaaliya, waxaan rajeyneynaa duub u dhigma Mas’uuliyadaada in aad ka qaadan doonto dalka, oo aan ognahay marxaladda uu xilligan ku suganyahay”
Wasiirada Howlaha guud iyo Kalluumeysiga Eng, Saalax Sheekh Cismaan iyo Maxamed Cumar Ceeymooy oo ugu dambeyn hadal kooban jeediyay ayaa hoosta ka xariiqay inay garab taagamyihiin Malaaqa Xamar iyo Xamardaye.
“Duubintaaga aan malaaqa aan duubnay macnahaheedu waxa waaye astaamaha nabadda oo aan gaarnay, sidaa awgeed malaaqa waa Malaaq Soomaaliyeed, waxaana daliil u ah, duubkiisa waxaa ka qeyb gashay Soomaali oo idil, Garbahaaga aan joognaa, sida hadda la sheegay waan kula shaqeyneynaa, waxaan balan qaadaneynaa in hiil iyo hoo baa an kula garab taaganahay, wax Alle iyo wixii shaqadaada oo fududeyn kara oo anaga xageena ah, kaga aadan, kan gobol ahaan kan xukuumad ahaan, ka dadnimo ahaan, waxaan leeyahay garabkaag ayaan taaganahay, mudane Malaaq soo dhawoow Malaaq soo dhawoow ayaan ku leenahay”
