War ka soo baxay Taliska ciidamada Mareykanka ee Afrika, ayaa lagu sheegay in kooxda Shabaab ay markan ku dhowdahay burbur kaddib markii ay la kulmeen dhabar jab weyn oo ku aaddan weerarrada dhanka cirka ah oo ay fuliyaan Dowladda Mareykanka.
Mareykanka waxa ay sheegeen weeraradii ugu dambeeyay ee dhanka cirka ah in lagu beegsaday Saraakiil muhiim ah oo ka tirsan Shabaab, gaar ahaan labo Sarkaal oo Shabaabka dhexdooda aad muhiim uga ahaa, marka loo eego howlihii Shabaabka ay u qaabilsanaayeen.
Duqeymaha ayaa dhacay horaantii Bishii May iyadoo kii igu dambeeyay uu dhacay 13-kii Bishii May waxaana lagu beegsaday Sagaal dagaalyahan oo ka tirsan Shabaab Saddex ka mid ahna waxaa la sheegay in lagu dilay duqeyntaas dhammaan Afarta weerar ee Mareykanku ka geystay Somaliya Bishii May waxay ka dhaceen meelo fog oo hoos yimaada Deegaanada Shabaabka ay maamulaan.
Dhabarjabka weeraradaasi Shabaabka ay kala kulmeen ayaa la sheegay inay halis ugu jiraan bur bur ku yimaado, maadaama ay waayeen Saraakiil waaweyn oo dhanka Millateriga u qaabilsanaa.
Warka ayaa lagu sheegay in xilli aan fogeyn ay kooxdu bur buri doonto marka la fiiriyo Khasaaraha ka soo gaaray Labadan hoggaamiye ee muhiimka u ahaa maleeshiyaadka Shabaab.
Labada Horjooge ee Shabaabka laga dilay, ayaa lagu kala magacaabi jiray Maxamed Dulyadeyn oo Jubbooyinka lagu dilay iyo Macalin Daa’ud ninkii u qaabilsanaa dhanka tababarada maleeshiyaadka, kaasi oo isagana Duqeyn dhanka cirka ah lagu dilay.
