Mashruuc shaqo lagu siinayo gabdhaha ka qalin jebiyay jaamacadaha ayaa maanta laga furay magaalada Muqdisho. Mashruucan oo ay iska kaashanayaan Hay’adda Iftin Foundation, Rugta Ganacsiga Soomaaliyeed iyo Dalladda Jaamacadaha Soomaaliyeed ayaa loogu talo galay in la suurtogeliyo in gabdhuhu ay shaqooyin ka helaan shirkadaha, hay’adaha, goobaha waxbarashada, dowladda iyo guud ahaan inta shaqooyinka bixisa.
Waxaa halkaasi lagu soo bandhigay daraasad ka hadleyso heerka shaqo-helista ee gabdhaha jaamacadaha ka baxay, waxaana daraasadda lagu soo ogaaday cabaqadaha ugu waaweyn ee gabdhaha ka haysta inay shaqo helaan, caqabadahaas oo isugu jira kuwa gabdhaha naftooda xiriir la leh, kuwo la xiriira shirkadaha iyo kuwo la xiriira dhaqanka Soomaaliyeed.
Waxaa sidoo kale halkaasi lagu soo bandhigay website la yiraahdo fursad.so oo loogu talo galay in gabdhaha jaamacadaha ka baxay ay ku soo bandhigan karaan CV-gooda, sidoo kale shirkadaha iyo hay’adaha shaqada bixiyana ay ka heli karaan gabdhaha ay doonayaan inay shaqo siiyaan. Waxaa sidoo kale daaha laga rogay nidaam SMS ah oo dadka shaqo-doonka ahi ay ku heli karaan shaqooyinka ka bannaan shirkadaha iyo hay’adaha, kaasoo adeegsanaya farriinta gaaban ee SMS-ka loo yaqaano.
Mudane C/raxmaan Galaambe oo ah Guddoomiye ku-xigeenka Rugta Ganacsiga ayaa sheegay in Rugtu ay horay u billowday mashruuc noocan oo kale ah oo shaqo lagu siinayo gabdhaha.
Guddoomiyaha Jaamacadda Soomaaliya, Md. C/raxmaan Ablaal ayaa yiri “20 sano ka hor waxaan u doodi jirnay in gabdhaha la keeno dugsiyada. 10 sano ka hor waxaan u doodi jirnay in gabdhaha jaamacado la geeyo, haddana waxay mareysaa in gabdhaha shaqo la siiyo”.
Intii ay xafladdu socotay illaa 3 shirkadood ayaa ballanqaaday inay shaqaaleysiin doonaan qaar ka mid ah gabdhaha ka soo qalinjebiyay jaamacadaha. Waxaa kaloo jira hay’ado ballanqaaday inay gabdhaha siin doonaan waayo-aragnimo (internship). “Waxaa muhiim ah in hay’aduhu isku qoraan inay shaqaaleysiinayaan gabdhaha. Illaa sidaas laga sameeyo lama xallin doono arrintan” ayuu yiri agaasimaha Dalladda Bulshada Rayidka ee SOSCENSA.
Guddoomiyaha Guddiga Shaqaalaha Rayidka, Cali Dheere, ayaa sheegay in 25% shaqaalah dowladda ay dumar yihiin, u u badan kuwa aan shahaado haysan. Wuxuu xusay ina muhiim tahay in fursado shaqo loo abuuro gabdhaha waxbartay iyo kuwa aan waxbaranba.
Wasiir hore Eng. C/raxmaan Yariisow ayaa sheegay inay muhiim tahay in la taageero olole noocan oo kale ah. Waxaa sidoo kale ka hadlay agaasimaha waaxda waxbarashada dadban ee Wasaaradda Waxbarashada iyo Agaasimaha Guud ee Wasaaradda Haweenka oo sheegay inay muhiim tahay in la taageero mashruucan.
Aweys Sheekh Xaddaad, agaasimaha guud ee Wasaaradda Shaqada iyo Arrimaha Bulshada ayaa xafladda lagu soo xiray ayaa sheegay inay muhiim tahay dowladdu u dooddo xuquuqda shaqaalaha dowladda iyo kuwa ka shaqeeya shirkadaha iyo hay’adaha. Wuxuu sheegay inay sameyn doonaan sharciyo dhiirrigelinaya in gabdhuhu ay shaqooyin helaan.
????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????
Wasaaradda Dhallinyarada iyo Ciyaaraha ee Dowladda Federaalka Soomaaliya ayaa soo gabagabeysay wejigii labaad ee wadatashiyada Qorshaha Qaran ee Dhallinyarada, Nabadda...
