Ku Simaha Guddoomiyaha Maamulka Gobolka Banaadir ahna Guddoomiye ku xigeenka dhinaca siyaasadda gobolka Banaadir Maxamed Axmed Diiriye iyo mas’uuliyiin ka tirsan Maamulka gobolka ayaa Xalay Kormeeray qaar ka mid ah Degmooyinka Muqdosho oo ay ugu kuur galayeen xaalada amni iyo mida horumarineed ee ka jira caasimada.
Degmooyinka ay kormeereen mas’uuliyiintaasi ayaa waxaa ka mid ah Degmada Hiliwaa,Yaaqshiid,Warta nabadda,Iyo Hodan, waxaana meelaha ay tageen mas’uuliyiintaasi dadka shacabka ah ay la wadaagayeen amniga guud ee ka jira ee caasimada, waxaana dhalinyaro kubad ku ciyaarayay Xaafada suuqa xoolaha ee degmada Hiliwaa ay la ciyaareen kubad xiligaasi ay ciyaarayeen, waxaana warbixino la xiriira xaalada degmada ay ka dhageysteen Guddoomiyaha Degmada Hiliwaa.
Mas’uuliyiinta ayaa Socod lug ah ka bilaabay Xaafada Suuqa Xoolaha iyagoo ku tagay Isgooyska Baar ubax, taasi oo dhiira galin u ah amniga buuxa ee ka jira caasimada, waxaana xaqiijinta amniga ka qeyb qaadanayay ciidamada Boliiska Soomaaliyeed, Iyo NISA.
Ku Simaha Guddoomiyaha Maamulka Gobolka Banaadir ahna Guddoomiye ku xigeenka dhinaca siyaasadda gobolka Banaadir Maxamed Axmed Diiriye oo kormeerka kaddib la hadlay warbaahinta Qaranka ayaa sheegay kormeerkii xalay in ay uga gon lahaayeen soo bandhigida amniga buuxa ee ka jira caasimada iyo in maamulka gobolka uu la socdo xaaladaha ka jira caasimada, waxaana uu sheegay in guddi ay u xilsaareen qiimeynta degmooyinka gobolka Banaadir si loo hubiyo howlaha ka socda degmooyinka gobolka Banaadir.
