Guusha ay ciidammada badda ee Midowga Yurub ka gaareen howl-galka la dagaallanka burcad badeedda ee xeebaha Soomaaliya, ayaa muujinaysa in howlgal la mid ah looga hortagi karo muhaajiriinta ku qulquleysa qaaradda Yurub ee ka gudbaya badda Mediterranean-ka sida ay sheegeyso Roberta Metsola oo ka tirsan baarlamanka Midowga Yurub.
“Waxaan isbarbardhig ku sameynayay labada xaaladood inta lagu jiray shirka baarlamaanka Yurub bilihii la soo dhaafay. Howl-galka Atlanta wuxuu wiiqay burcadbadeedda xeebaha Soomaaliya, sidaa darteed maxaysan Midowga Yurub ugu isticmaali Karin isla ciidanka si ay uga hortagaan tahriibinta dadka ee badda Mediterranean-ka” ayay BBC u sheegtay Metsola .
Ku dhawaad kun qof oo tahriibayaal ah ayaa la aaminsan yahay inay ku dhinteen badda u dhaxeysa Liibiya iyo Talyaaniga labadii bil ee la soo dhaafay, maalintii isniinta Wasiirada arrimaha dibadda ee midowga Yurub ayaa isku raacay toban qodob oo qorshe-howleed ah, taas oo si degdeg ah uga hortagaysa dadka tirada badan ee muhaajiriinta ah ee ka soo gudbaya kuna dhammaanaya badda.
Qorshahan ayaa xoojinaya howlgalka raadinta iyo badbaadinta dadka, kor u qaadidda dhaqaalaha lagu bixinayo Frontex oo ah howl-gal la socda xudduudaha oo ay Midowga Yurub leeyihiin iyo sameynta olole lagu burburinayo doomayaha tahriibeyaasha.
Midowga Yurub ayaa abaabulaya shir gaar ah oo looga doodayo jawaab ay ku mideysan yihiin Yurub oo ku saabsan xaaladda muhaajiriinta soo gaaraya qaaradda. Shirkaas ayaa dhici doonta maalinta khamiista ah.
“Waxaan rajaynayaa in Ra’iiwul-wasaarayaasha Midwga Yurub ay ka soo qeyb gali doonaan shirka khamiista isla markaana ay qorsheyaasha u beddeli doonaan ficil siyaasadeed” ayay tiri. Roberta Metsola oo ka tirsan baarlamanka Midowga Yurub.
Tahriibeyaasha ku dhammaanaya badda u dhaxeysa Yurub iyo Afrika ayaa u badan dadka ka soo jeeda qaaradaha Afrika iyo Asia, waxaa ku jira Soomaali badan oo ka tahriiba xebaha dalka Liibiya. Boqollaal ka mid ah ayaa ku dhammaada badda halka qaar kale ay badbadiyaan ciidamada baddu.
