Muwaadiin Soomaaliyeed oo tiradooda gaareysay Afar ayaa la sheegay inay ku dhinteen dab ka kacay dukaan ay dhex hurdayeen oo ku yaalla tuulada Injolli oo ku taalla duleedka magaalada P E ee Dalka K/Afrika.
Warar is khilaafsan ayaa ka soo baxaya dhimashada wiilashan,waxa ayna wararka qaar sheegayaan in dabka uu ka kacay dukaanka dhexdiisa kadibna uu ku baahay dhamaan dukaanka oo ay wiilasha u dhinteen qiicii dabka halka Wararka qaar ay sheegaan in dabka la qabadsiiyay dusha dukaanka.
Muwaadiintan geeriyooday ayaa lagu magacaabi jiray, Axmed Xooshow, Xuseen Cali, iyo labada kale ayaa magacayooda lagu soo gaabiyay Aweys iyo C/rashiid.
Muxudiin Jilley oo ka mid ah ganacsatada Somaaliyeed ayaa Radio Muqdisho u sheegay in ay arintaani walaac badan ku abuurtay Soomaalida K/Afrika, isagoo sheegay in ay u gurmanayaan sidii muwaadiniintani loo aaasi lahaa.
“ Wiilashan waxaa ay mashaqadaan ku dhacday xilli saq dhexe ah iyagoo hurdo ku jiro waxa ayna u dhinteen qaac dabka, laba ka mid ah iyagoo nool ayaa banaanka la keenay kadib ayay dhinteen waana ka xunnahay” ayuu yiri Muxudiin Jilley.
Todobaadkii hore ayay ahayd markii muwaadin Soomaaliyeed u geeriyooday dab ka kacay dukaankiisa isagoo meyd ah laga soo saaray goobtiisa ganacsi.
Dhanka kale waxaa Xaafadda Mayfair ee Johannseburg ka dhacay banaanbax ay soo qabanqaabiyeen qaar ka mid ah Jaaliyadda Soomaaliyeed ee magaladaasi kaasoo Dowladda Hindia loogu dalbanayay inay xuriyadooda siiso muwaadiinta ku xiran dalkeeda muddo sanado ah, iyadoo dhanka kale Dowladda Soomaaliya loogu baaqay inay xoogga saarto sidii muwaadintaasi loogu soo celin lahaa Dalkooda, waxa ayna bananaabaxayasha ku dhawaaqayeen erayo looga soo horjeedo xariga wakhtiga dheer qaatay ee muwaadiinta.
C/qaadir Axad
