Waxaa maanta Magaalada Muqdisho la keenay 13-Dhalinyaro ah oo ku xirneyd Xabsiyada Liibiya oo dowlada Soomaaliya ay suurta galisay in dalka lagu soo celiyo.
Safiirka Soomaaliya ee Midowyga Yurub Cali Saciid Faqi oo la socday Dhalinyaradan ayaa sheegay in Xabsiyada ay booqdeen ay kusoo arkeen Dhibaatooyinka lagu hayo Muhaajiriinta Soomaaliya, isagoona codsaday in Dhalinyaradan dalkooda dib loogu soo celiyay ay helaan Shaqo Abuur iyo Waxbarasho ay dalka iyo dadka wax ugu qabtaan
“Qeybta Sedexaad ee Muhaajiriinta Soomaaliyeed ee ku dhibaateysneyd Dalka Liibiya ayaan maanta keenay Magaalada Muqdisho, Dhalinyaradan ayaa dhibaatooyin kala duwan kala soo kulmay dalkaasi sida dil iyo Nolol aad u qaab daran oo Gaajo iyo Cuduro ay ugu darnaayeen, waxaan rajeyneynaa in Dhalinyarada loo abuuro dhaqaalo ay ku shaqeysan karaan ama inay helan waxbarasho dalka iyo dadka ay uga faa’iideyn karaan” ayuu yiri Safiirka Midowga Yurub ee Soomaaliya.
Wasiir ku xigeenka Wasaaradda Arimaha Dibada Xukuumadda Soomaaliya Mukhtaar Mahad Daa’uud oo ka mid ahaa Masuuliyiinta Dhalinyaradan kusoo dhaweeyay Garoonka Diyaaradaha Aadan Cadde ayaa sheegay Talaabo Guul ah ay qaaday Dowlada Soomaaliya, waxaana uu sheegay in arintan ay qeyb ka aheyd balanqaadyadii Madaxweyne Farmaajo intii uu ku jiray Ololaha Doorashada
“Waa markii Sedexaad oo Maxaabiis laga keeno dalka Liibiya, waana balanqaadkii dowladan Nabad iyo Nolol, waxaana arintaan fulinteeda ka qeyb qaatay Ururka Caalamiga ee IOM iyo UNHCR, waxaan sidoo kale aad ugu mahad celineynaa Safiirkeena Midowga Yurub Mr Fiqi, waxaan filayaa in qeyb ka mid Balanqaadkii Madaxweynaha intii uu ku jiray Ololaha doorashada uu fuliyay”ayuu yiri Ku Xigeenka Wasiirka arimaha dibada.
Qaar ka mid ah Dhalinyaradan dalka dib loogu soo celiyay oo la hadlay Warbaahinta ayaa ka mahad celiyay sida Dowlada Soomaaliya ugu dadaashay in dalkooda hooyo ay dib ugu soo laabtaan, iyagoo ugu baaqay in Dhalinyarada Soomaaliyeed ay dalkooda dhistaan isla markaana ay iska daayaan Tahriibka.
Dowladda Soomaaliya ayaa waxaa dhowr jeer oo hore qaar kamida Dalalka Caalamka ay ka soo deysay dhalinyaro Soomaaliyeed oo ku xirnaa, waxaana Dalalkaas kamid ah Ethiopia, India, Jaziirada siishalis iyo Dalka Liibiya waxaana sidoo kale jira Qorshayaal kale oo Dowladdu wado kuwaas oo iyana lagu soo deynayo Dhalinyaro ku xiran Dalal kale oo Caalamka ah.
