Boqol qoys oo danyar ah kuna nool degmada Afgooye ee gobolka Sh/hoose ayaa loo qeybiyay raashin gargaar ah oo ay soo dhiibeen dad muxsiniin ah oo ku nool waqooyiga Ameerika, kuwaasoo ku midoobay hey’adda Somali Relief.
Wakiilka Hey’addaasi Ibraahim Cismaan Cabdulla oo raashinkaasi qeybiyay ayaa sheegay in lacagta lagu iibiyay raashinkaasi uu soo dhiibay madaxa hey’adda Somali Relief mudane Aadan Maxamed Ciise.
Ibraahim Cismaan Cabdulla oo ah wakiilka hey’addaasi ayaa xusay in boqolka qoys oo ay raashinka u qeybsheen ay yihiin dad la soo xulay oo aad u danyar, islamarkaana ay ka muuqato diif iyo dhibaato ka dhalatay nolol xumada heysata.
Wuxuu u mahadceliyay walaalaha Soomaaliyeed ee soo dhiibay gargaarka loo qeybiyay dadkaasi Soomaaliyeed ee danyarta ah, isagoo ku dheeraaday ka hadalka qiimaha ay adduun iyo aakhiraba u leedahay gargaarka loo fidiyo dadka danyarta ah ee aan heli karin nolol maalmeedka.
Wakiilka hey’addaasi oo hadalkiisa sii wata ayaa ku boorriyay dadka Soomaaiyeed ee wax heysta iney soo gargaaraan walaalohooda ku tabaaleeysan dalka.
