Guddoomiye ku-xigeenka Gobolka Hiiraan ee xagga arrimaha bulshada ayaa maanta kormeer howleed ku tegay Tuulada Xeen-Daabta ee dhanka waqooyi ka xigta magaalada Beladweyne si uu ugu kuur galo xaaladaha dhabta ah ee ay ku noolyihiin dadka deegaanka.
Qoysaska ku nool deegaanka Xeen-daabta ayaa waxaa ka mid ah Qoysas ku xoolo beelay abaaraha Gobolka ka jira iyo kuwa ay saameeyeen fatahaadihii dhacay, iyadoo qaar kamid ah dadkaan oo la hadlay Warbaahinta Qaranka ay dalbadeen in lacaawiyo.
Guddoomiye ku xigeenka dhinaca arimaha bulshada ee Gobolka Sheekh Xuseen Cusmaan Cali oo kormeeray deegaanka ayaa waxa uu sheegay in xaaladda ay dadkaan ku sugan yihiin u gudbin doonaan Maamulka iyo Hay’adaha Samafalka si loo soo gaarsiiyo gurmad dhinac kasta leh.
“Wixii aan meeshaan ku arkay xafiiska Guddoomiyaha Gobolka waa u gudbinayaa, Hay’adahana waan gaarsiinayaa, xaq waxaa u leedihiin in aad wax walba oo nolosha ka mid ah aad heshaan, anaguna dadaalkeena ma idinka hagran doono” Ayuu yiri Guddoomiye ku-xigeenka Gobolka Hiiraan ee dhanka Arrimaha Bulshada.
Guddoomiye ku-xigeenka dhinaca arrimaha bulshada ee Gobolka Hiiraan Sheekh Xuseen Cusmaan Cali ayaa sheegay in dhamaan deegaannada hoosyimaad Gobolka uu kormeer howleed ku tegi doono, si ay u ogaadaan baahiyaha gaarka ah ee ay qabaan.
