Ra’iisul Wasaaraha Xukuumadda Federaalka Soomaaliya Mudane Xasan Cali Kheyre ayaa xafiiskiisa magaalada Muqdisho ku qaabilay Safiirka Imaaraadka Carabta u fadhiya Soomaaliya Danjire Maxamed Axmed Othman Al Hammadi.
Kulanka oo dhacay maalintii Talaadada ayaa Labada mas’uul waxay ka wada hadleen xiriirka labada Dowladood xaga amniga, dhaqaalaha iyo kordhinta taageerada Soomaaliya kaga timaado Imaaraadka Carabta.
Mudane Xasan Cali Kheyre, Ra’iisul Wasaaraha Soomaaliya ayaa safiirka Imaaraadka ee Soomaaliya Mohammed Ahmed Othman Al Hammadi uga Mahad celiyay taageerada beni-aadanimo iyo midka dhaqaale ay siiyaan Soomaaliya, sida lagu daabacay Wakaalada Wararka Imaaraadka ee WAM.
Dowladda Imaaraadka Carabta ayaa Arbacadii la soo dhaafay balan qaaday daaweynta 100-Qof oo ka mid ah dadkii ku dhaawacmay Qaraxii ismiidaaminta ahaa ee maleeshiyada Al-Shabaab ka fulisay Isgoyska mashquulka badan ee Ex-Soobe halkaasi oo dad badan ay ku nafwaayeen kuwo kalena ay ku dhaawacmeen.
Sidoo kale Imaaraadka Carabta ayaa shaaciyay iney agab caafimaad oo ay ka mid yihiin daawooyin u soo dirayaan Soomaaliya si loogu kordhiyo xarumaha caafimaad ee la gaarsiiyay dadkii Qaraxa ku dhaawacmay.
Ugu danbeyntii, Imaaraadka Carabta ayaa shaaca ka qaaday in Hay’adda Bisha cas ee Imaaraadka ay daryeeli doonto 300-carruur Agoon ah oo Qoyskooda muddo lix bilood ah, ee Waalidiintooda ku waayay Qaraxyadii dhacay, waxaana lagu dari doona Barnaamijka daryeelka Agoonta ay maalgeliso Imaaraadka Carabta.
