Kulankaan xalay lagu qabtay xarunta taliska ciidanka booliska Soomaaliyeed ee Kumaanda Buluusiya ayaa waxaa ka qayb galay ku xigeeenka ra’iisul wasaaraha dalka mudane Maxamed Cumar Carte,wasiirka amniga gudaha mudane Cabdi risaaq Cumar Maxamed ,gudoomiyaha gobolka Banaadir Xasan Maxamed Xuseen Muungaab,taliyaasha booliska iyo NISA sidoo kale saraakiisha booliska iyo nabadsugida qaybahooda kala duwan waxaana ajandihiisu ahaa shirkaas ka hadalka amaanka dalka si gaar ah magaalada caasimada ah ee Xamar.
Kulanka oo uu furay taliyaha ciidanka booliska Soomaaliyeed gen Maxamed Sheikh Xasan Xaamud ayaa waxaa uu ku bilowday is barasho saraakiisha iyo mas’uuliyiinta u dhexeysa ka dibna waxaa la guda galay muhiimada shirka saraakiisha ayaa mid mid looga dhageestay talooyinkooda la xiriira amaanka iyadoo la soo bandhigay dukumenteri muujinaya shaqada boolisku hayo.
Ra’iisul wasaare ku xigeeenka dalka mudane Maxamed Cumar Carte oo ka hadlay kulankaas ayaa waxaa uu la dar daarmay mas’uuliyiinta hay’adaha amniga dalka ee kulanka la qaatay waxaana uu u soo jeediyay in wada shaqeyn dhaw ay yeeshaan isla markaana la dar dar galiyo sugida amaanka iyo hortaga UGUS.
Shirkaan oo qaatay mudo 4 saacadood ka badan ayaa markii uu soo idlaaday waxaa warbaahinta qaranka la hadlay taliyaha hugaanka howlaha booliska sareeye guuto Axmed Xasan Maalin.
“Shir ayaa waxaa isugu yimid taliska ciidanka booliska ,ra’isul wasaare ku xigeeenka wasiirka amniga ,duqa magaalada ,taliyaha ciidanka booliska iyo taliyaha nabad sugida shirkaas oo looga hadlayay amniga sidii amniga loo hormari lahaa sidii looga shaqey lahaa,howlo badan oo amniga quseeya ayaa looga hadlayay hade shirku waxaa uu ku dhamaaday si afgarad ah oo wanaagsan, waxaana looga hadlayay wanaaga iyo shaqada hay’adaha dowladda, waxaana la isla gartay amniga si wada jir ah in looga shaqeeyo iyadoo aan la dhihin kanaa boolis ah kanaa nabad sugid ah ama kanaa gobol ah, maamulka gobolka,boliiska iyo nabad sugida si wada jir ah in ay u wada shaqeeyaan”ayuu yiri Maalin.
Kulamada amaanka looga hadlayo ayaa maalmahaan waxaa ay ahaayeen kuwo joogto ah habeen uun ka hor ayayna ahayd markii si wada jir ah ay shir kan la mid ah uga qayb gtaleeen xarunta hay’ada NISA ra’iisul wasaaraha dalka iyo ku xigeenkiisa waxaana ay qayb ka yihiin iskaashiga dar dar galinta howlaha amaanka lagu sugayo ee ka dhaxeeya madaxda sare iyo hay’adaha amaanka.
SAWIR QAADE AXMED CALI KAAHIYE
