Casho Sharaftan loo sameeyay Xildhibaan C/qaadir Macalin Nuur Siyaad oo ka mid ah Xildhibaanada Golaha Baarlamaanka Federaalka ah ee Soomaaliya oo Xiligan Booqasho ku jooga Dalka Sudan ayaa waxa kasoo qayb galay Safiirka Soomaaliya ee Dalka Sudan Mudane Maxamed C/laahi Ugaas, Safiirka Jabuuti ee Sudan, Mas’uuliyiin ka socotay Dowladda aan walaaha nahay ee Sudan, Aqoonyahano Soomaali ah iyo Marti sharaf kale.
Sidoo kale waxa Casha sharafta Goob joog ka ahaa Diblumaasiyiin ka tirsan Safaaradda Soomaaliya ee Sudan oo ay ka mid ahaayeen Lataliya Koowaad ee Safaaradda Mudane Ibraahin Guure Maxamed, Uqaybsanaha Dhanka Tacliinta Mudane C/qaadir Maxamuud Cali Guulane iyo Uqaybsaha Dhanka Warfaafinta Mudane Fiidow Maxamuud Fiidow.
Casha Sharaftan oo ay garab socotay Shahaado Gudoonsiin la gudoonsiinayay Dadkii gacanta ka geestay Soo dhawaynta Xildhibaanka ahna Maamulaha Jaamacadda Imaamu Shaafici ee xarunteeda tahay Magaalada Muqdisho ayaa waxa soo abaabulay Safaaradda Soomaaliyeed ee Dalka Sudan.
Ugu horayn waxaa Munaasabadaas Safaaraddu u sameysay Xildhibaanka hadal Furitaan ah ka jeediyay Safiirka Soomaaliya ee Sudan Maxamed C/laahi Ugaas isagoo aad ugu mahadnaqay Cid walba oo Gacan ka geesatay soo dhawaynta Xildhibaanka.
Waxa uuna Safiirka oo hadalkiisa sii wata Xildhibaanka si gaar ah ugu amaanay in uu yahay Nin gacan wayn ka geestay faafinta Diinta Islaamka maadaama aabaha Xildhibaanka uu ahaa Macalin Nuur Maxamed Siyaad oo si wayn Soomaaliya looga yaqaano gaar ahaan Dariiqada Suufiyada.
Sidoo kale waxaa halkaas Qudbado kasoo jeediyay Mas’uuliyiin ka Socotay Jaamacadda Afrika ee Caalamiga ah, Jaamacadda Al-Qur’aan Al-kariim, iyo Culumo ka socotay Dariiqooyinka Suufida ee kala duwan ee Sudan ka jira.
Waxaana sidoo kale halkaas hadal kooban ka jeediyay Xildhibaan C/qaadir Macalin Nuur Maxamed Siyaad isaga oo aad ugu mahadnaqay Safaaradda Soomaaliya oo uu horkacayo Safiirka Dowladda Soomaaliya u fadhiya Dalka Sudan Mudane Maxamed C/laahi Ugaas Faarax, ugana mahadnaqay sida uu qadarinta leh ee ula shaqeeyay intii uu Sudan booqashada ku joogay.
Ugu Dambeyntii waxaa halkaas Shahaado Sharaf lagu gudoonsiiyay Mas’uuliyiin ka socotay Culumada Suufida oo Munaasabadda goob joog ka ahaa, waxa ayna kusoo dhamaatay Jawi heer sare ah.
