Ugu yaraan 11 dhagarqabe oo ka tirsanaa argagixisada Al-Shabaab ayaa maanta lagu dilay howlgal qorsheysan oo ciidanka Qaranku ay ka fuliyeen deegaan ka tirsan gobolka Jubbada Hoose.
Degaanka Ceelcadde oo qiyaastii 30 KM u jira magaalada Kismaayo ayaa lagu dilay xubnahaas ka tirsanaa kooxda nabad-diidka ah ee Al-Shabaab, sidoo kale waxaa nolosha lagu qabtay labo dhagarqabe oo ka tirsan Al-Shabaab, sida ay warbaahinta Qaranka u xaqiijiyeen saraakiisha Danab.
Ururka 5-aad Guutada 16-aad ee ciidanka kumaandooska xoogga dalka ee Danab ayaa fuliyey howlgalkaas, waxayna ciidanka qaranku Al-Shabaab ka furteen 6-qori AK47 ah iyo hal qori oo BKM ah.
Taliyaha Ururka 5-aad Guutada 16-aad ee ciidanka kumaandooska xoogga dalka Soomaaliyeed ee Danab Carab dheeg Axmed oo howlgalka hoggaaminayey ayaa faahfaahintaan siiyey warbaahinta Qaranka.
